nawak-zani nigah ki ai jaan-e-jaan hai hech

nāvak-zanī nigāh kī ai jān-e-jāñ hai hech

jab tiir hī na paar huā to kamāñ hai hech

dair-o-haram bhī hech haiñ aur hech bāġh-o-rāġh

koī jagah ho be tire ai lā-makāñ hai hech

firdaus ham ko sāya-e-dāmān-e-yār hai

duniyā kī asl kuchh nahīñ bāġh-e-jināñ hai hech

kuchh maut kā na ġham hai na kuchh rāhat-e-hayāt

kūche meñ us ke mujh ko bahār-o-ḳhizāñ hai hech

chāragarī karegā jo vo hai mizāj-dāñ

dard-e-darūñ kā rū-ba-rū us ke bayāñ hai hech

ho jā ke kū-e-yār meñ ai murġh-e-jāñ muqīm

bāġh-o-bahār hech hai aur āshiyāñ hai hech

qātil ke paas jā.ūñgā maiñ ḳhud hī sar-ba-kaf

maqtal meñ us kā aanā pa.e imtihāñ hai hech

kyā takiya us pe kījiye aalam hai be-sabāt

hastī abas hayāt abas jism-o-jāñ hai hech

tauhīd-e-ishq meñ mujhe donoñ haiñ ek se

marg-o-hayāt hech hai sūd-o-ziyāñ hai hech

jo us kī ḳhūbiyoñ kā sanā-ḳhvāñ na ho kabhī

vo hech aur us ke dahan meñ zabāñ hai hech

huuñ mahv-e-dīd aañkh uThā.ūñ maiñ kis taraf

dekhūñ maiñ kis ko juz tire husn-e-butāñ hai hech

juz zikr-e-yār aur kahānī nahīñ pasand

sab qisse mujh ko hech haiñ aur qissa-ḳhvāñ hai hech

nālāñ jo haiñ jahāñ meñ ġham-e-ishq se tire

nāqūs un ko hech hai bāñg-e-azāñ hai hech

kyā asl teġh kī tire abrū ke sāmne

tīr-e-mizha ke sāmne nok-e-sināñ hai hech

haiñ band āñkheñ 'barq' kī dil meñ hai terī yaad

kyā dekhe sar uThā ke use sab jahāñ hai hech

nawak-zani nigah ki ai jaan-e-jaan hai hech

jab tir hi na par hua to kaman hai hech

dair-o-haram bhi hech hain aur hech bagh-o-ragh

koi jagah ho be tere ai la-makan hai hech

firdaus hum ko saya-e-daman-e-yar hai

duniya ki asl kuchh nahin bagh-e-jinan hai hech

kuchh maut ka na gham hai na kuchh rahat-e-hayat

kuche mein us ke mujh ko bahaar-o-KHizan hai hech

chaaragari karega jo wo hai mizaj-dan

dard-e-darun ka ru-ba-ru us ke bayan hai hech

ho ja ke ku-e-yar mein ai murgh-e-jaan muqim

bagh-o-bahaar hech hai aur aashiyan hai hech

qatil ke pas jaunga main KHud hi sar-ba-kaf

maqtal mein us ka aana pae imtihan hai hech

kya takiya us pe kijiye aalam hai be-sabaat

hasti abas hayat abas jism-o-jaan hai hech

tauhid-e-ishq mein mujhe donon hain ek se

marg-o-hayat hech hai sud-o-ziyan hai hech

jo us ki KHubiyon ka sana-KHwan na ho kabhi

wo hech aur us ke dahan mein zaban hai hech

hun mahw-e-did aankh uThaun main kis taraf

dekhun main kis ko juz tere husn-e-butan hai hech

juz zikr-e-yar aur kahani nahin pasand

sab qisse mujh ko hech hain aur qissa-KHwan hai hech

nalan jo hain jahan mein gham-e-ishq se tere

naqus un ko hech hai bang-e-azan hai hech

kya asl tegh ki tere abru ke samne

tir-e-mizha ke samne nok-e-sinan hai hech

hain band aankhen 'barq' ki dil mein hai teri yaad

kya dekhe sar uTha ke use sab jahan hai hech