naz-o-ghamza-numa kalam aae

nāz-o-ġhamza-numā kalām aa.e

tere naame the mere naam aa.e

ham kise ham-safar kaheñ ki yahāñ

jitne saath aa.e chand gaam aa.e

jaane kyā baat hai ki tere huzūr

lab pe har baat nā-tamām aa.e

haa.e tujh bin tujhe ḳhabar hī nahīñ

kitne be-kaif sub.h-o-shām aa.e

ek tere ḳhulūs-e-dil ke sivā

ham kahīñ se na tishna-kām aa.e

ab Thahartī nahīñ kahīñ bhī nazar

de duā koī yā salām aa.e

'daur' kyā kufr hai ki ab lab par

allāh allāh na raam raam aa.e

naz-o-ghamza-numa kalam aae

tere name the mere nam aae

hum kise ham-safar kahen ki yahan

jitne sath aae chand gam aae

jaane kya baat hai ki tere huzur

lab pe har baat na-tamam aae

hae tujh bin tujhe KHabar hi nahin

kitne be-kaif subh-o-sham aae

ek tere KHulus-e-dil ke siwa

hum kahin se na tishna-kaam aae

ab Thaharti nahin kahin bhi nazar

de dua koi ya salam aae

'daur' kya kufr hai ki ab lab par

allah allah na ram ram aae