nabud o bud ke manzar banata rahta hun

nabūd o buud ke manzar banātā rahtā huuñ

maiñ zard aag meñ ḳhud ko jalātā rahtā huuñ

tire jamāl kā sadqa ye ātish-e-raushan

charāġh āb-e-ravāñ par bahātā rahtā huuñ

duā.eñ us ke liye haiñ sadā.eñ us ke liye

maiñ jis kī raah meñ bādal bichhātā rahtā huuñ

udaas dhun hai koī un ġhazāl āñkhoñ meñ

diye ke saath jise gungunātā rahtā huuñ

ajiib sust-ravī se ye din guzarte haiñ

maiñ āsmān pe shāmeñ banātā rahtā huuñ

maiñ uḌtā rahtā huuñ niile samundaroñ meñ kahīñ

so titliyoñ ke liye ḳhvāb laatā rahtā huuñ

ye mujh meñ phail rahā hai jo iztirāb-e-shadīd

to phir ye tai hai use yaad aatā rahtā huuñ

nabud o bud ke manzar banata rahta hun

main zard aag mein KHud ko jalata rahta hun

tere jamal ka sadqa ye aatish-e-raushan

charagh aab-e-rawan par bahata rahta hun

duaen us ke liye hain sadaen us ke liye

main jis ki rah mein baadal bichhata rahta hun

udas dhun hai koi un ghazal aankhon mein

diye ke sath jise gungunata rahta hun

ajib sust-rawi se ye din guzarte hain

main aasman pe shamen banata rahta hun

main uDta rahta hun nile samundaron mein kahin

so titliyon ke liye KHwab lata rahta hun

ye mujh mein phail raha hai jo iztirab-e-shadid

to phir ye tai hai use yaad aata rahta hun