nadamat hai bana kar is chaman mein aashiyan mujhko

nadāmat hai banā kar is chaman meñ āshiyāñ mujh ko

milā hamdam yahāñ koī na koī ham-zabāñ mujh ko

dikhā.e jā ravānī tausan-e-umr-e-ravāñ mujh ko

hilāl-e-barq se rakh ham-rikāb-o-ham-ināñ mujh ko

banāyā nā-tavānī ne sulaimān-e-zamāñ mujh ko

uḌā kar le chale mauj-e-nasīm-e-bostāñ mujh ko

dam-e-sub.h-e-azal se maiñ navā-sanjoñ meñ huuñ tere

batāyā bulbul-e-sidra ne andāz-e-fuġhāñ mujh ko

mirī bātoñ meñ kyā ma.alūm kab so.e vo kab jaage

sire se is liye kahnī paḌī phir dāstāñ mujh ko

bahā kar qāfila se duur jism-e-zār ko pheñkā

ki mauj-e-sail thī bāñg-e-darā-e-kārvāñ mujh ko

ye dil kī be-qarārī ḳhaak ho kar bhī na jā.egī

sunātī hai lab-e-sāhil se ye reg-e-ravāñ mujh ko

uḌaa.ī ḳhaak jis sahrā meñ tere vāste maiñ ne

thakā-māñda milā in manziloñ meñ āsmāñ mujh ko

tasavvur sham.a kā jis ko jilā de huuñ vo parvāna

lag uTThī aag dil meñ jab nazar aayā dhuāñ mujh ko

vo jis aalam meñ jā pahuñchā vahāñ maiñ kis tarah jā.ūñ

huā dil aap se bāhar pinhā kar beḌiyāñ mujh ko

ġhubār-e-rāh se ai 'nazm' ye āvāz aatī hai

ga.ī ai umr-e-rafta tū kidhar pheñkā kahāñ mujh ko

nadamat hai bana kar is chaman mein aashiyan mujh ko

mila hamdam yahan koi na koi ham-zaban mujh ko

dikhae ja rawani tausan-e-umr-e-rawan mujh ko

hilal-e-barq se rakh ham-rikab-o-ham-inan mujh ko

banaya na-tawani ne sulaiman-e-zaman mujh ko

uDa kar le chale mauj-e-nasim-e-bostan mujh ko

dam-e-subh-e-azal se main nawa-sanjon mein hun tere

bataya bulbul-e-sidra ne andaz-e-fughan mujh ko

meri baaton mein kya malum kab soe wo kab jage

sire se is liye kahni paDi phir dastan mujh ko

baha kar qafila se dur jism-e-zar ko phenka

ki mauj-e-sail thi bang-e-dara-e-karwan mujh ko

ye dil ki be-qarari KHak ho kar bhi na jaegi

sunati hai lab-e-sahil se ye reg-e-rawan mujh ko

uDai KHak jis sahra mein tere waste main ne

thaka-manda mila in manzilon mein aasman mujh ko

tasawwur shama ka jis ko jila de hun wo parwana

lag uTThi aag dil mein jab nazar aaya dhuan mujh ko

wo jis aalam mein ja pahuncha wahan main kis tarah jaun

hua dil aap se bahar pinha kar beDiyan mujh ko

ghubar-e-rah se ai 'nazm' ye aawaz aati hai

gai ai umr-e-rafta tu kidhar phenka kahan mujh ko