nadi pahaD ghane jangalon mein charcha tha

nadī pahāḌ ghane jañgaloñ meñ charchā thā

vo be-gunāh shajar be-libās kitnā thā

milī thī shāḳh-e-samar nūr-e-jism-o-jāñ ke liye

jise vo haath lagā kar bujhā bujhā sā thā

tamām umr dil-o-jāñ murāqabe meñ rahe

latīf-tar lab-o-ruḳhsār kā vazīfa thā

kuchh is tarah saf-e-sayyārgāñ huī barham

phir is ke baad na sūraj thā aur na saaya thā

jahāñ pe ḳhāk-e-bayābāñ ḳhirām kartī hai

vahāñ pe takiya-e-mahtāb thā darīcha thā

na.ī sharī.at-e-jamhūr basne vaalī thī

na.e ufuq se vo 'ḳhurshīd' ugne vaalā thā

nadi pahaD ghane jangalon mein charcha tha

wo be-gunah shajar be-libas kitna tha

mili thi shaKH-e-samar nur-e-jism-o-jaan ke liye

jise wo hath laga kar bujha bujha sa tha

tamam umr dil-o-jaan muraqabe mein rahe

latif-tar lab-o-ruKHsar ka wazifa tha

kuchh is tarah saf-e-sayyargan hui barham

phir is ke baad na suraj tha aur na saya tha

jahan pe KHak-e-bayaban KHiram karti hai

wahan pe takiya-e-mahtab tha daricha tha

nai shariat-e-jamhur basne wali thi

nae ufuq se wo 'KHurshid' ugne wala tha