nae ghamze nae andaz nazar aate hain

na.e ġhamze na.e andāz nazar aate haiñ

din-ba-din husn ke e.ajāz nazar aate haiñ

vo shahīd-e-nigah-e-nāz nazar aate haiñ

āj-kal aur hī andāz nazar aate haiñ

sar jhukā.e hue chaltā huuñ tire kūche meñ

kyūñki sar-bāz hī sar-bāz nazar aate haiñ

bahut ūñche na uḌe haiñ na uḌeñge gesū

ye kabūtar to girah-bāz nazar aate haiñ

jhuuT ḳhud bolnā ulTā mujhe jhūTā kahnā

sach hai dam-bāzoñ ko dam-bāz nazar aate haiñ

bhej to dī hai ġhazal dekhiye ḳhush hoñ ki na hoñ

kuchh khaTakte ho.e alfāz nazar aate haiñ

ġhamza-o-nāz-o-adā mehr-o-vafā jaur-o-jafā

sab ke sab ḳhāna-bar-andāz nazar aate haiñ

lutf aa.e jo shab-e-vasl mo.azzin so jaa.e

kyūñki vo gosh-bar-āvāz nazar aate haiñ

umar guzrī hamīñ sarkār pe marte marte

jaan dete haiñ to jāñ-bāz nazar aate haiñ

bulbuloñ se nahīñ gulzār-e-zamāna ḳhālī

shukr hai yaañ bhī ham-āvāz nazar aate haiñ

bad-gumānī bhī mohabbat kā nishāñ hai 'parvīñ'

ġhalatī ho to ho nārāz nazar aate haiñ

nae ghamze nae andaz nazar aate hain

din-ba-din husn ke eajaz nazar aate hain

wo shahid-e-nigah-e-naz nazar aate hain

aaj-kal aur hi andaz nazar aate hain

sar jhukae hue chalta hun tere kuche mein

kyunki sar-baz hi sar-baz nazar aate hain

bahut unche na uDe hain na uDenge gesu

ye kabutar to girah-baz nazar aate hain

jhuT KHud bolna ulTa mujhe jhuTa kahna

sach hai dam-bazon ko dam-baz nazar aate hain

bhej to di hai ghazal dekhiye KHush hon ki na hon

kuchh khaTakte hoe alfaz nazar aate hain

ghamza-o-naz-o-ada mehr-o-wafa jaur-o-jafa

sab ke sab KHana-bar-andaz nazar aate hain

lutf aae jo shab-e-wasl moazzin so jae

kyunki wo gosh-bar-awaz nazar aate hain

umar guzri hamin sarkar pe marte marte

jaan dete hain to jaan-baz nazar aate hain

bulbulon se nahin gulzar-e-zamana KHali

shukr hai yan bhi ham-awaz nazar aate hain

bad-gumani bhi mohabbat ka nishan hai 'parwin'

ghalati ho to ho naraaz nazar aate hain