nae gul khile nae dil bane nae naqsh kitne ubhar gae

na.e gul khile na.e dil bane na.e naqsh kitne ubhar ga.e

vo payambarān-e-sad inqilāb jidhar jidhar se guzar ga.e

jo shahīd-e-rāh-e-vafā hue vo isī ḳhushī meñ magan rahe

ki jo din the un kī hayāt ke ġham-e-zindagī meñ guzar ga.e

abhī saath saath to the magar mujhe mere haal pe chhoḌ kar

mire ham-jalīs kahāñ ga.e mire ham-safīr kidhar ga.e

mirī justujū ko faqīh-e-shahr batā rahā hai sharīk-e-zeher

use kyā ḳhabar ki dimāġh o dil yahī zahr khā ke nikhar ga.e

are o adīb-e-fasurda-ḳhū are o muġhanni-e-rañg o bū

abhī hāshiye pe khaḌā hai tū bahut aage ahl-e-hunar ga.e

nae gul khile nae dil bane nae naqsh kitne ubhar gae

wo payambaran-e-sad inqilab jidhar jidhar se guzar gae

jo shahid-e-rah-e-wafa hue wo isi KHushi mein magan rahe

ki jo din the un ki hayat ke gham-e-zindagi mein guzar gae

abhi sath sath to the magar mujhe mere haal pe chhoD kar

mere ham-jalis kahan gae mere ham-safir kidhar gae

meri justuju ko faqih-e-shahr bata raha hai sharik-e-zeher

use kya KHabar ki dimagh o dil yahi zahr kha ke nikhar gae

are o adib-e-fasurda-KHu are o mughanni-e-rang o bu

abhi hashiye pe khaDa hai tu bahut aage ahl-e-hunar gae