nae har roz hote hadse achchhe nahin lagte

na.e har roz hote hādse achchhe nahīñ lagte

bahut hālāt bhī sahme hue achchhe nahīñ lagte

muhāfiz hai tirā dāman bahut hī ḳhuun meñ ālūd

magar ye daaġh dāman par tire achchhe nahīñ lagte

faqat amn-o-amāñ kī baat ho to achchhā lagtā hai

diloñ meñ ḳhauf dahshat vasvase achchhe nahīñ lagte

qadam pichhlā uThā.egā tabhī aage baḌhegā tū

shikasta dil shikasta hausle achchhe nahīñ lagte

ziyāda jānte haiñ jo ziyāda chup hī rahte haiñ

agar ham bhī ziyāda bolte achchhe nahīñ lagte

chalo mil kar raheñ jab phuul ik Daalī ke haiñ donoñ

guloñ ke darmiyāñ ye fāsle achchhe nahīñ lagte

amīrī aur ġharībī dekh kar ye faisle karnā

amīr-e-shahr tere faisle achchhe nahīñ lagte

tumheñ āvāz detā huuñ chale aao jahāñ ho tum

tumhāre hijr meñ ab ratjage achchhe nahīñ lagte

nasīhat aur hikāyat hai na.ī nasloñ kī hī ḳhātir

purāne daur ke ab falsafe achchhe nahīñ lagte

kabhī bārish kabhī garmī kabhī sardī zarūrī hai

kisī ko 'sād' mausam ek se achchhe nahīñ lagte

nae har roz hote hadse achchhe nahin lagte

bahut haalat bhi sahme hue achchhe nahin lagte

muhafiz hai tera daman bahut hi KHun mein aalud

magar ye dagh daman par tere achchhe nahin lagte

faqat amn-o-aman ki baat ho to achchha lagta hai

dilon mein KHauf dahshat waswase achchhe nahin lagte

qadam pichhla uThaega tabhi aage baDhega tu

shikasta dil shikasta hausle achchhe nahin lagte

ziyaada jaante hain jo ziyaada chup hi rahte hain

agar hum bhi ziyaada bolte achchhe nahin lagte

chalo mil kar rahen jab phul ek Dali ke hain donon

gulon ke darmiyan ye fasle achchhe nahin lagte

amiri aur gharibi dekh kar ye faisle karna

amir-e-shahr tere faisle achchhe nahin lagte

tumhein aawaz deta hun chale aao jahan ho tum

tumhaare hijr mein ab ratjage achchhe nahin lagte

nasihat aur hikayat hai nai naslon ki hi KHatir

purane daur ke ab falsafe achchhe nahin lagte

kabhi barish kabhi garmi kabhi sardi zaruri hai

kisi ko 'sad' mausam ek se achchhe nahin lagte