nae uslub mein zinda hue hain

na.e uslūb meñ zinda hue haiñ

tabhī to harf-e-ā.inda hue haiñ

tulū-e-sub.h kī ummīd kam thī

duā-e-shab se tābinda hue haiñ

na kaam aayā jahāñ arz-e-hunar bhī

lab-e-iz.hār sharminda hue haiñ

badan meñ jiite jī jo mar ga.e the

vo apnī ruuh meñ zinda hue haiñ

hamārī sho.alagī sab se judā hai

bujhe haiñ ham to sozinda hue haiñ

miTā saktā nahīñ jin ko zamāna

kuchh aise naqsh-e-pā.inda hue haiñ

hameñ sūd-o-ziyāñ se kyā 'suḳhan' ham

na yābinda na gīrinda hue haiñ

nae uslub mein zinda hue hain

tabhi to harf-e-ainda hue hain

tulu-e-subh ki ummid kam thi

dua-e-shab se tabinda hue hain

na kaam aaya jahan arz-e-hunar bhi

lab-e-izhaar sharminda hue hain

badan mein jite ji jo mar gae the

wo apni ruh mein zinda hue hain

hamari shoalagi sab se juda hai

bujhe hain hum to sozinda hue hain

miTa sakta nahin jin ko zamana

kuchh aise naqsh-e-painda hue hain

hamein sud-o-ziyan se kya 'suKHan' hum

na yabinda na girinda hue hain