nae zamane mein ab ye kamal hone laga

na.e zamāne meñ ab ye kamāl hone lagā

ki qatl kar ke bhī qātil nihāl hone lagā

mirī tabāhī kā baa.is jo hai zamāne se

usī ko ab mirā kaahe ḳhayāl hone lagā

havā-e-ishq ne bhī gul khilā.e haiñ kyā kyā

jo merā haal thā vo terā haal hone lagā

shab-e-firāq vo kaisā thā jashn yādoñ kā

ki jis kā zikr bhī bād-e-visāl hone lagā

jo ranj-o-ġham meñ mire saath saath thā ab tak

use bhī merī ḳhushī se malāl hone lagā

jahāñ pe manzar-e-jalva thā sirf vahm o gumāñ

vahīñ pe jalsa-e-zohra-jamāl hone lagā

tumhāre qadr se agar baḌh rahī ho parchhā.īñ

samajh lo dhuup kā vaqt-e-zavāl hone lagā

na ḳhud ko bechā na koī ḳhushāmadeñ kī haiñ

to kaise tum pe ye 'bekal' savāl hone lagā

nae zamane mein ab ye kamal hone laga

ki qatl kar ke bhi qatil nihaal hone laga

meri tabahi ka bais jo hai zamane se

usi ko ab mera kahe KHayal hone laga

hawa-e-ishq ne bhi gul khilae hain kya kya

jo mera haal tha wo tera haal hone laga

shab-e-firaq wo kaisa tha jashn yaadon ka

ki jis ka zikr bhi baad-e-visal hone laga

jo ranj-o-gham mein mere sath sath tha ab tak

use bhi meri KHushi se malal hone laga

jahan pe manzar-e-jalwa tha sirf wahm o guman

wahin pe jalsa-e-zohra-jamal hone laga

tumhaare qadr se agar baDh rahi ho parchhain

samajh lo dhup ka waqt-e-zawal hone laga

na KHud ko becha na koi KHushamaden ki hain

to kaise tum pe ye 'bekal' sawal hone laga