nae zamanon ki chap to sar pe aa khaDi thi

na.e zamānoñ kī chaap to sar pe aa khaḌī thī

mirī samā'at guzishta advār meñ paḌī thī

udhar diye kā badan havā se thā paara paara

idhar añdhere kī aañkh meñ ik kiran gaḌī thī

falak pe thā ātishīñ daraḳhtoñ kā ek jañgal

aur un daraḳhtoñ ke biich tārīk jhoñpaḌī thī

samā.ī kis tarah merī āñkhoñ kī putliyoñ meñ

vo ek hairat jo ā.īne se bahut baḌī thī

jise piroyā thā apne hāthoñ se tere ġham ne

sadā-e-girya meñ hichkiyoñ kī ajab laḌī thī

hamārī palkoñ pe raqs karte hue sharāre

aur āsmāñ meñ kahīñ sitāroñ kī phuljaḌī thī

tulūa sub.h-e-hazār ḳhurshīd kī du'ā par

bujhe charāġhoñ kī raakh dāman pe aa paḌī thī

sabhī ġhamīñ the mire piyāle meñ zahr pā kar

maiñ mutma.in thā ki merī takmīl kī ghaḌī thī

savāl-e-ruḳh gulsitāñ meñ aayā to phuul Thahrā

laboñ kī hasrat suḳhan meñ pahuñchī to pankhuḌī thī

ye log to un dinoñ bhī nā-kHush the 'shahryārā'

ki jin dinoñ mere paas jaadū kī ik chhaḌī thī

nae zamanon ki chap to sar pe aa khaDi thi

meri sama'at guzishta adwar mein paDi thi

udhar diye ka badan hawa se tha para para

idhar andhere ki aankh mein ek kiran gaDi thi

falak pe tha aatishin daraKHton ka ek jangal

aur un daraKHton ke bich tarik jhonpaDi thi

samai kis tarah meri aankhon ki putliyon mein

wo ek hairat jo aaine se bahut baDi thi

jise piroya tha apne hathon se tere gham ne

sada-e-girya mein hichkiyon ki ajab laDi thi

hamari palkon pe raqs karte hue sharare

aur aasman mein kahin sitaron ki phuljaDi thi

tulua subh-e-hazar KHurshid ki du'a par

bujhe charaghon ki rakh daman pe aa paDi thi

sabhi ghamin the mere piyale mein zahr pa kar

main mutmain tha ki meri takmil ki ghaDi thi

sawal-e-ruKH gulsitan mein aaya to phul Thahra

labon ki hasrat suKHan mein pahunchi to pankhuDi thi

ye log to un dinon bhi na-kHush the 'shahryara'

ki jin dinon mere pas jadu ki ek chhaDi thi