nafs namrud hai kya hona hai

nafs namrūd hai kyā honā hai

shirk maujūd hai kyā honā hai

kashf maqsūd hai kyā honā hai

haal mafqūd hai kyā honā hai

sajde hote haiñ kise o ġhāfil

kaun ma.abūd hai kyā honā hai

chhoḌ duniyā-e-danī kā pīchhā

is se kyā suud hai kyā honā hai

hast-o-būd-e-tan-e-ḳhākī ik din

nīst-nābūd hai kyā honā hai

saaf hotā ki ho az-ḳhud rafta

raah masdūd hai kyā honā hai

dekhiye hashr ko kaise guzre

roz-e-ma.hūd hai kyā honā hai

chāhiye masjid-e-aqsā meñ namāz

dair masjūd hai kyā honā hai

man-o-salvā jise ham samjhe haiñ

zahr-ālūd hī kyā honā hai

garmī-e-ishq-o-nihāl-e-hastī

ātish-o-ūd hai kyā honā hai

jauhar-e-rūh tan-e-ḳhākī meñ

kyā gul-andūd hai kyā honā hai

jo ki mansūr ke pesh aayā thā

vahī maujūd hai kyā honā hai

ḳhud parastī kī burī hai sūrat

abd ma.abūd hai kyā honā hai

ai 'sabā' dekhiye vo parda-nashīñ

kis se ḳhush-nūd hai kyā honā hai

nafs namrud hai kya hona hai

shirk maujud hai kya hona hai

kashf maqsud hai kya hona hai

haal mafqud hai kya hona hai

sajde hote hain kise o ghafil

kaun mabud hai kya hona hai

chhoD duniya-e-dani ka pichha

is se kya sud hai kya hona hai

hast-o-bud-e-tan-e-KHaki ek din

nist-nabud hai kya hona hai

saf hota ki ho az-KHud rafta

rah masdud hai kya hona hai

dekhiye hashr ko kaise guzre

roz-e-mahud hai kya hona hai

chahiye masjid-e-aqsa mein namaz

dair masjud hai kya hona hai

man-o-salwa jise hum samjhe hain

zahr-alud hi kya hona hai

garmi-e-ishq-o-nihaal-e-hasti

aatish-o-ud hai kya hona hai

jauhar-e-ruh tan-e-KHaki mein

kya gul-andud hai kya hona hai

jo ki mansur ke pesh aaya tha

wahi maujud hai kya hona hai

KHud parasti ki buri hai surat

abd mabud hai kya hona hai

ai 'saba' dekhiye wo parda-nashin

kis se KHush-nud hai kya hona hai