nagar nagar mele ko gae kaun sunega teri pukar

nagar nagar mele ko ga.e kaun sunegā terī pukār

ai dil ai dīvāne dil! dīvāroñ se sar de maar

ruuh ke is vīrāne meñ terī yaad hī sab kuchh thī

aaj to vo bhī yuuñ guzrī jaise ġharīboñ kā tyauhār

us ke vaar pe shāyad aaj tujh ko yaad aa.e hoñ vo din

ai nādān ḳhulūs ki jab vo ġhāfil thā ham hushyār

pal pal sadiyāñ biit ga.iiñ jaane kis din badlegī

ek tirī āhista-ravī ek zamāne kī raftār

pichhlī fasl meñ jitne bhī ahl-e-junūñ the kaam aa.e

kaun sajā.egā terī mashq kā sāmāñ ab kī baar?

sub.h ke nikle dīvāne ab kyā lauT ke ā.eñge

Duub chalā hai shahr meñ din phail chalā hai sāya-e-dār

nagar nagar mele ko gae kaun sunega teri pukar

ai dil ai diwane dil! diwaron se sar de mar

ruh ke is virane mein teri yaad hi sab kuchh thi

aaj to wo bhi yun guzri jaise gharibon ka tyauhaar

us ke war pe shayad aaj tujh ko yaad aae hon wo din

ai nadan KHulus ki jab wo ghafil tha hum hushyar

pal pal sadiyan bit gain jaane kis din badlegi

ek teri aahista-rawi ek zamane ki raftar

pichhli fasl mein jitne bhi ahl-e-junun the kaam aae

kaun sajaega teri mashq ka saman ab ki bar?

subh ke nikle diwane ab kya lauT ke aaenge

Dub chala hai shahr mein din phail chala hai saya-e-dar