nahin aaram ek ja dil ko

nahīñ ārām ek jā dil ko

aah kyā jaane kyā huā dil ko

ai butāñ mohtaram rakho is ko

kahte haiñ ḳhāna-e-ḳhudā dil ko

le to jaate ho mehrbāñ lekin

kiijo mat aap se judā dil ko

muñh na pherā kabhī jafā se tirī

āfrīñ dil ko marhabā dil ko

ye tavaqqo' na thī hameñ hargiz

ki dikhāoge ye jafā dil ko

haiñ yahī Dhang aap ke to ḳhair

kyuuñ na phir dījiyegā aa dil ko

āḳhir us tifl-e-shoḳh ne dekhā

TukḌe juuñ shīsha kar diyā dil ko

aaj lagtī hai kuchh baġhal ḳhālī

kaun siine se le gayā dil ko

ham to kahte haiñ tujh ko ai 'bedār'

kiijo mat us se āshnā dil ko

nahin aaram ek ja dil ko

aah kya jaane kya hua dil ko

ai butan mohtaram rakho is ko

kahte hain KHana-e-KHuda dil ko

le to jate ho mehrban lekin

kijo mat aap se juda dil ko

munh na phera kabhi jafa se teri

aafrin dil ko marhaba dil ko

ye tawaqqo' na thi hamein hargiz

ki dikhaoge ye jafa dil ko

hain yahi Dhang aap ke to KHair

kyun na phir dijiyega aa dil ko

aaKHir us tifl-e-shoKH ne dekha

TukDe jun shisha kar diya dil ko

aaj lagti hai kuchh baghal KHali

kaun sine se le gaya dil ko

hum to kahte hain tujh ko ai 'bedar'

kijo mat us se aashna dil ko