nahin aasman teri chaal mein nahin aaunga

nahīñ āsmāñ tirī chaal meñ nahīñ ā.ūñgā

maiñ palaT ke ab kisī haal meñ nahīñ ā.ūñgā

mirī ibtidā mirī intihā kahīñ aur hai

maiñ shumāra-e-mah-o-sāl meñ nahīñ ā.ūñgā

abhī ik azaab se hai safar ik azaab tak

abhī rañg-e-shām-e-zavāl meñ nahīñ ā.ūñgā

vahī hālateñ vahī sūrateñ haiñ nigāh meñ

kisī aur sūrat-e-hāl meñ nahīñ ā.ūñgā

mujhe qaid karne kī zahmateñ na uThā.iye

nahīñ ā.ūñgā kisī jaal meñ nahīñ ā.ūñgā

maiñ ḳhayāl-o-ḳhvāb hisār se bhī nikal chukā

so kisī ke ḳhvāb-o-ḳhayāl meñ nahīñ ā.ūñgā

na ho bad-gumāñ mirī dād-ḳhvāhi-e-hijr se

mirī jaañ maiñ shauq-e-visāl meñ nahīñ ā.ūñgā

nahin aasman teri chaal mein nahin aaunga

main palaT ke ab kisi haal mein nahin aaunga

meri ibtida meri intiha kahin aur hai

main shumara-e-mah-o-sal mein nahin aaunga

abhi ek azab se hai safar ek azab tak

abhi rang-e-sham-e-zawal mein nahin aaunga

wahi haalaten wahi suraten hain nigah mein

kisi aur surat-e-haal mein nahin aaunga

mujhe qaid karne ki zahmaten na uThaiye

nahin aaunga kisi jal mein nahin aaunga

main KHayal-o-KHwab hisar se bhi nikal chuka

so kisi ke KHwab-o-KHayal mein nahin aaunga

na ho bad-guman meri dad-KHwahi-e-hijr se

meri jaan main shauq-e-visal mein nahin aaunga