nahin aisa bhi ki yaksar nahin rahne wala

nahīñ aisā bhī ki yaksar nahīñ rahne vaalā

dil meñ ye shor barābar nahīñ rahne vaalā

jis tarah ḳhāmushī lafzoñ meñ Dhalī jaatī hai

is meñ tāsīr kā unsur nahīñ rahne vaalā

ab ye kis shakl meñ zāhir ho, ḳhudā hī jaane

rañj aisā hai ki andar nahīñ rahne vaalā

maiñ use chhoḌnā chāhūñ bhī to kaise chhoḌūñ?

vo kisī aur kā ho kar nahīñ rahne vaalā

ġhaur se dekh un āñkhoñ meñ nazar aatā hai

vo samundar jo samundar nahīñ rahne vaalā

jurm vo karne kā sochā hai ki bas ab kī baar

koī ilzām mire sar nahīñ rahne vaalā

maiñ ne hālāñki bahut vaqt guzārā hai yahāñ

ab maiñ is shahr meñ pal bhar nahīñ rahne vaalā

maslahat lafz pe do harf na bhejūñ? 'javvād'

jab mire saath muqaddar nahīñ rahne vaalā

nahin aisa bhi ki yaksar nahin rahne wala

dil mein ye shor barabar nahin rahne wala

jis tarah KHamushi lafzon mein Dhali jati hai

is mein tasir ka unsur nahin rahne wala

ab ye kis shakl mein zahir ho, KHuda hi jaane

ranj aisa hai ki andar nahin rahne wala

main use chhoDna chahun bhi to kaise chhoDun?

wo kisi aur ka ho kar nahin rahne wala

ghaur se dekh un aankhon mein nazar aata hai

wo samundar jo samundar nahin rahne wala

jurm wo karne ka socha hai ki bas ab ki bar

koi ilzam mere sar nahin rahne wala

main ne haalanki bahut waqt guzara hai yahan

ab main is shahr mein pal bhar nahin rahne wala

maslahat lafz pe do harf na bhejun? 'jawwad'

jab mere sath muqaddar nahin rahne wala