nahin aisa ki kabhi shauq par-afshan bhi nahin

nahīñ aisā ki kabhī shauq par-afshāñ bhī nahīñ

dil ko thā naaz ki vīrāñ hai so vīrāñ bhī nahīñ

kyoñ haiñ tūfān kī zad meñ haram-o-dair-o-kunisht

in mazāroñ pe to muddat se charāġhāñ bhī nahīñ

kis ne is anjuman-e-shauq ko tārāj kiyā

dil guzargāh-e-ḳhayālāt-e-pareshāñ bhī nahīñ

shauq-e-afsurda kā mujh se na gila kar ki mujhe

e.atibār-e-karam-e-jumbish-e-mizhgāñ bhī nahīñ

jalva-ābād-e-tasavvur ba-adākārī-e-shauq

ab to marhūn-e-fusūñ-sāzī-e-jānāñ bhī nahīñ

kā.enāt apnī hameñ de ke bhī fāriġh nahīñ aap

ham to kuchh mudda.ī-e-vus.at-e-dāmāñ bhī nahīñ

kabhī is samt ko bhī bahr-e-tamāshā niklo

dil kā hairat-kada aisā koī vīrāñ bhī nahīñ

hairat-ābād tamāshā meñ na zulmat hai na nuur

koī pinhāñ bhī nahīñ hai koī uryāñ bhī nahīñ

kab se maiḳhāne meñ 'rizvī' nahīñ aaya hai nazar

is ḳhizāñ-dost ko kuchh sharm-e-bahārāñ bhī nahīñ

nahin aisa ki kabhi shauq par-afshan bhi nahin

dil ko tha naz ki viran hai so viran bhi nahin

kyon hain tufan ki zad mein haram-o-dair-o-kunisht

in mazaron pe to muddat se charaghan bhi nahin

kis ne is anjuman-e-shauq ko taraj kiya

dil guzargah-e-KHayalat-e-pareshan bhi nahin

shauq-e-afsurda ka mujh se na gila kar ki mujhe

eatibar-e-karam-e-jumbish-e-mizhgan bhi nahin

jalwa-abaad-e-tasawwur ba-adakari-e-shauq

ab to marhun-e-fusun-sazi-e-jaanan bhi nahin

kaenat apni hamein de ke bhi farigh nahin aap

hum to kuchh muddai-e-wusat-e-daman bhi nahin

kabhi is samt ko bhi bahr-e-tamasha niklo

dil ka hairat-kada aisa koi viran bhi nahin

hairat-abaad tamasha mein na zulmat hai na nur

koi pinhan bhi nahin hai koi uryan bhi nahin

kab se maiKHane mein 'rizwi' nahin aaya hai nazar

is KHizan-dost ko kuchh sharm-e-bahaaran bhi nahin