nahin chamke ye hansne mein tumhaare dant anjum se

nahīñ chamke ye hañsne meñ tumhāre daañt anjum se

nikal aa.ī taḌap kar barq āġhosh-e-tabassum se

karo tum mujh se bāteñ aur maiñ bāteñ karūñ tum se

kalīm-ullāh ho jā.ūñ maiñ ejāz-e-takallum se

sadā-e-lan-tarānī aatī hai un ke takallum se

girā deñ tūr-e-dil par sā.iqa barq-e-tabassum se

falak ko vajd hogā ai parī tere tabassum se

utar aa.egī zohra raqs kartī bazm-e-anjum se

ye shauq-e-mai-kashī majnūñ banā kar mujh ko laayā hai

nikal aa.e kahīñ lailā-e-mai bhī mahmil-e-ḳham se

kiyā dāñtoñ ko rañgīñ vaah rahī bātoñ kī rañgīnī

lagī āb-e-guhar meñ aag lo barq-e-tabassum se

samand-e-nāz kī Tāpoñ se sar Takrā.eñ sab āshiq

pilā sharbat shahādat kā kisī din kāsa-e-sam se

jo vo mehr-e-sip.har-e-husn nāche apnī mahfil meñ

to zohra mash.al-e-mah le ke aa.e bazm-e-anjum se

usī din phuul haiñ jis din vo gul turbat pe aa baiThe

sivum se kuchh ġharaz mujh ko na kuchh matlab hai panjum se

jo uljhe mohtasib maiḳhāne meñ ham jaa.eñ masjid ko

ḳhudā ke ghar chaleñ sar phoḌ kar ḳhisht-e-sar-e-ḳhum se

firāq-e-yār meñ merī tarah se ye bhī ro.e haiñ

savād-e-shab nahīñ kājal bahā hai chashm-e-anjum se

huā maiñ riñd-mashrab ḳhaak mar kar is tamannā meñ

namāz āḳhir paḌeñge vo kisī din to tayammum se

vahī chitvan vahī tevar mirī āñkhoñ meñ phirte haiñ

ġhazab meñ paḌ gayā dekhā abas tum ne tarahhum se

kahāñ tak eḌiyāñ ragḌeñ galā kaaTo galā kaaTo

uThāo tum na ḳhanjar baaz aayā is tarahhum se

jo va.ada karte ho to sadma-e-furqat na dikhlānā

masīhā hote ho mash.hūr jī uThtā huuñ maiñ tum se

mudallal jo suḳhan apnā hai vo burhān-e-qāte.a hai

tabī.at meñ ravānī hai ziyāda haft-qulzum se

mare haiñ ishq meñ ik gul ke kyuuñ qur.āñ mañgāte ho

paḌhī jaa.e gulistāñ meñ sivum meñ bāb-e-panjum se

jo pahuñche tā-falak shohra tumhārī ḳhud-faroshī kā

ḳharīdārī ko aa.e mushtarī bāzār-e-anjum se

evaz chūne ke gaarā laa.e mai kā chāhiye saaqī

hamārī qabr agar pakkī ho to ḳhisht-e-sar-e-ḳhum se

hamesha ḳhaak chhanvāoge misl-e-qais sahrā kī

'qalaq' ko ye na thī ummīd ai lailā-manash tum se

nahin chamke ye hansne mein tumhaare dant anjum se

nikal aai taDap kar barq aaghosh-e-tabassum se

karo tum mujh se baaten aur main baaten karun tum se

kalim-ullah ho jaun main ejaz-e-takallum se

sada-e-lan-tarani aati hai un ke takallum se

gira den tur-e-dil par saiqa barq-e-tabassum se

falak ko wajd hoga ai pari tere tabassum se

utar aaegi zohra raqs karti bazm-e-anjum se

ye shauq-e-mai-kashi majnun bana kar mujh ko laya hai

nikal aae kahin laila-e-mai bhi mahmil-e-KHam se

kiya danton ko rangin wah rahi baaton ki rangini

lagi aab-e-guhar mein aag lo barq-e-tabassum se

samand-e-naz ki Tapon se sar Takraen sab aashiq

pila sharbat shahadat ka kisi din kasa-e-sam se

jo wo mehr-e-siphar-e-husn nache apni mahfil mein

to zohra mashal-e-mah le ke aae bazm-e-anjum se

usi din phul hain jis din wo gul turbat pe aa baiThe

siwum se kuchh gharaz mujh ko na kuchh matlab hai panjum se

jo uljhe mohtasib maiKHane mein hum jaen masjid ko

KHuda ke ghar chalen sar phoD kar KHisht-e-sar-e-KHum se

firaq-e-yar mein meri tarah se ye bhi roe hain

sawad-e-shab nahin kajal baha hai chashm-e-anjum se

hua main rind-mashrab KHak mar kar is tamanna mein

namaz aaKHir paDenge wo kisi din to tayammum se

wahi chitwan wahi tewar meri aankhon mein phirte hain

ghazab mein paD gaya dekha abas tum ne tarahhum se

kahan tak eDiyan ragDen gala kaTo gala kaTo

uThao tum na KHanjar baz aaya is tarahhum se

jo wada karte ho to sadma-e-furqat na dikhlana

masiha hote ho mashhur ji uThta hun main tum se

mudallal jo suKHan apna hai wo burhan-e-qatea hai

tabiat mein rawani hai ziyaada haft-qulzum se

mare hain ishq mein ek gul ke kyun quran mangate ho

paDhi jae gulistan mein siwum mein bab-e-panjum se

jo pahunche ta-falak shohra tumhaari KHud-faroshi ka

KHaridari ko aae mushtari bazar-e-anjum se

ewaz chune ke gara lae mai ka chahiye saqi

hamari qabr agar pakki ho to KHisht-e-sar-e-KHum se

hamesha KHak chhanwaoge misl-e-qais sahra ki

'qalaq' ko ye na thi ummid ai laila-manash tum se