nahin gulon ki jo kanTon ki ab KHushi hai mujhe

nahīñ guloñ kī jo kāñToñ kī ab ḳhushī hai mujhe

ki rāste meñ ye daulat paḌī milī hai mujhe

kuchh aisī aag sī mahsūs ho rahī hai mujhe

kahīñ kī bhaḌkī huī jaise lag ga.ī hai mujhe

bahut maiñ soch chukā phir bhī ek soch meñ huuñ

ki jaise aur bhī kuchh sochnā abhī hai mujhe

rah-e-safar meñ hai duur ek zau ḳhudā jaane

ye shahr se ki bayābāñ se tak rahī hai mujhe

kalī ke dil pe ga.ī hai mirī nazar jab se

bahut aziiz kalī kī shaguftagī hai mujhe

havas ke daur-e-junūñ meñ mire liye kyā hai

chalo nasīb to ik zaḳhm-e-āgahī hai mujhe

nahin gulon ki jo kanTon ki ab KHushi hai mujhe

ki raste mein ye daulat paDi mili hai mujhe

kuchh aisi aag si mahsus ho rahi hai mujhe

kahin ki bhaDki hui jaise lag gai hai mujhe

bahut main soch chuka phir bhi ek soch mein hun

ki jaise aur bhi kuchh sochna abhi hai mujhe

rah-e-safar mein hai dur ek zau KHuda jaane

ye shahr se ki bayaban se tak rahi hai mujhe

kali ke dil pe gai hai meri nazar jab se

bahut aziz kali ki shaguftagi hai mujhe

hawas ke daur-e-junun mein mere liye kya hai

chalo nasib to ek zaKHm-e-agahi hai mujhe