nahin hai ab koi rasta nahin hai

nahīñ hai ab koī rasta nahīñ hai

koī juz aap ke apnā nahīñ hai

har ik raste kā patthar pūchhtā hai

tujhe kyā kuchh bhī ab dikhtā nahīñ hai

ajab hai raushnī tārīkiyoñ sī

ki maiñ huuñ aur mirā saayā nahīñ hai

parastish kī hai merī dhaḌkanoñ ne

tujhe maiñ ne faqat chāhā nahīñ hai

maiñ shāyad tere dukh meñ mar gayā huuñ

ki ab siine meñ kuchh dukhtā nahīñ hai

luTā dī maut bhī qadmoñ pe tere

bachā kar tujh se kuchh rakkhā nahīñ hai

qayāmat hai yahī idrāk-e-jānāñ

maiñ us kā huuñ ki jo merā nahīñ hai

mirī bāteñ haiñ sab bāteñ tumhārī

mirā apnā koī qissa nahīñ hai

tujhe mahsūs bhī maiñ kar na pā.ūñ

añdherā hai magar itnā nahīñ hai

ba-juz 'nītū' kī yādeñ ab jahāñ meñ

koī 'shahzād'-jī terā nahīñ hai

nahin hai ab koi rasta nahin hai

koi juz aap ke apna nahin hai

har ek raste ka patthar puchhta hai

tujhe kya kuchh bhi ab dikhta nahin hai

ajab hai raushni tarikiyon si

ki main hun aur mera saya nahin hai

parastish ki hai meri dhaDkanon ne

tujhe main ne faqat chaha nahin hai

main shayad tere dukh mein mar gaya hun

ki ab sine mein kuchh dukhta nahin hai

luTa di maut bhi qadmon pe tere

bacha kar tujh se kuchh rakkha nahin hai

qayamat hai yahi idrak-e-jaanan

main us ka hun ki jo mera nahin hai

meri baaten hain sab baaten tumhaari

mera apna koi qissa nahin hai

tujhe mahsus bhi main kar na paun

andhera hai magar itna nahin hai

ba-juz 'nitu' ki yaaden ab jahan mein

koi 'shahzad'-ji tera nahin hai