nahin hai bahr-o-bar mein aisa mere yar koi

nahīñ hai bahr-o-bar meñ aisā mere yaar koī

ki jis ḳhitte kā miltā ho na da.avedār koī

yūñhī buniyād kā darja nahīñ miltā kisī ko

khaḌī kī jā.egī mujh par abhī dīvār koī

patā chalne nahīñ detā kabhī fariyādiyoñ ko

lagā kar baiTh jaatā hai kahīñ darbār koī

nigāheñ us ke chehre se nahīñ haTtīñ jo dekhūñ

ki hai us ke gale meñ besh-qīmat haar koī

bachātā phirtā huuñ dariyā meñ apnī kashtī-e-jāñ

kabhī is paar hai koī bhī us paar koī

usī kā qahr barpā hai usī kā faiz jaarī

har ik majbūr kā hai mālik-o-muḳhtār koī

kahlvāyā hai us ne phāñd kar dīvār aa jaanā

agar darvāze par baiThā ho pahre-dār koī

nahin hai bahr-o-bar mein aisa mere yar koi

ki jis KHitte ka milta ho na dawedar koi

yunhi buniyaad ka darja nahin milta kisi ko

khaDi ki jaegi mujh par abhi diwar koi

pata chalne nahin deta kabhi fariyaadiyon ko

laga kar baiTh jata hai kahin darbar koi

nigahen us ke chehre se nahin haTtin jo dekhun

ki hai us ke gale mein besh-qimat haar koi

bachata phirta hun dariya mein apni kashti-e-jaan

kabhi is par hai koi bhi us par koi

usi ka qahr barpa hai usi ka faiz jari

har ek majbur ka hai malik-o-muKHtar koi

kahlwaya hai us ne phand kar diwar aa jaana

agar darwaze par baiTha ho pahre-dar koi