nahin jo daulat-e-zad-e-safar to kya gham hai

nahīñ jo daulat-e-zād-e-safar to kyā ġham hai

yahī matā.a bahut hai ki azm-e-mohkam hai

qadam qadam pe havādis qadam qadam ḳhatre

batā rahe haiñ ki manzil kā fāsla kam hai

ye mai-kade ke haiñ baanī inheñ sharāb na do

huzūr jurm baḌā hai sazā bahut kam hai

hamārī baat hī kyā thī rahī rahī na rahī

tumhārī baat to rakh lī hai kyā ye kuchh kam hai

haiñ ab bhī sāġhar-o-mīnā ke tazkire 'ġhālib'

ki ab na haath meñ jumbish na aañkh meñ dam hai

rah-e-adab meñ jale to haiñ kuchh charāġh na.e

magar ye kaun batā.e ki raushnī kam hai

ye kis maqām pe ham aa ga.e haiñ ai 'rahmat'

na zindagī kī ḳhushī hai na maut kā ġham hai

nahin jo daulat-e-zad-e-safar to kya gham hai

yahi mataa bahut hai ki azm-e-mohkam hai

qadam qadam pe hawadis qadam qadam KHatre

bata rahe hain ki manzil ka fasla kam hai

ye mai-kade ke hain bani inhen sharab na do

huzur jurm baDa hai saza bahut kam hai

hamari baat hi kya thi rahi rahi na rahi

tumhaari baat to rakh li hai kya ye kuchh kam hai

hain ab bhi saghar-o-mina ke tazkire 'ghaalib'

ki ab na hath mein jumbish na aankh mein dam hai

rah-e-adab mein jale to hain kuchh charagh nae

magar ye kaun batae ki raushni kam hai

ye kis maqam pe hum aa gae hain ai 'rahmat'

na zindagi ki KHushi hai na maut ka gham hai