nahin ki nama-baron ko talash karte hain

nahīñ ki nāma-baroñ ko talāsh karte haiñ

ham apne be-ḳhabaroñ ko talāsh karte haiñ

mohabbatoñ kā bhī mausam hai jab guzar jaa.e

sab apne apne gharoñ ko talāsh karte haiñ

sunā hai kal jinheñ dastār-e-iftiḳhār milī

vo aaj apne saroñ ko talāsh karte haiñ

ye ishq kyā hai ki iz.hār-e-ārzū ke liye

harīf nauhagaroñ ko talāsh karte haiñ

ye ham jo DhūñDte phirte haiñ qatl-gāhoñ ko

dar-asl chāragaroñ ko talāsh karte haiñ

rihā hue pa ajab haal hai asīroñ kā

ki ab vo apne paroñ ko talāsh karte haiñ

'farāz' daad ke qābil hai justujū un kī

jo ham se dar-badaroñ ko talāsh karte haiñ

nahin ki nama-baron ko talash karte hain

hum apne be-KHabaron ko talash karte hain

mohabbaton ka bhi mausam hai jab guzar jae

sab apne apne gharon ko talash karte hain

suna hai kal jinhen dastar-e-iftiKHar mili

wo aaj apne saron ko talash karte hain

ye ishq kya hai ki izhaar-e-arzu ke liye

harif nauhagaron ko talash karte hain

ye hum jo DhunDte phirte hain qatl-gahon ko

dar-asl chaaragaron ko talash karte hain

riha hue pa ajab haal hai asiron ka

ki ab wo apne paron ko talash karte hain

'faraaz' dad ke qabil hai justuju un ki

jo hum se dar-badaron ko talash karte hain