nahin mumkin ki tere hukm se bahar main hun

nahīñ mumkin ki tire hukm se bāhar maiñ huuñ

ai sanam tābe-e-farmān-e-muqaddar maiñ huuñ

dil to hairān hai kyuuñ shashdar-o-muztar maiñ huuñ

ishq kahtā hai ki us parde ke andar maiñ huuñ

pairav-e-silsila-e-zulf-e-muambar maiñ huuñ

tauq se uzr na zanjīr se bāhar maiñ huuñ

āb-rū-e-sadaf o zīnat-e-gosh-e-mahbūb

durr-e-nāyāb jo sunte ho vo gauhar maiñ huuñ

ab subuk-dosh maiñ huuñ bojh gale kā Tal jaa.e

teġh-e-qātil se ilāhī kaheñ be-sar maiñ huuñ

tā.er-e-qibla-numā kā hai ishāra mujh se

naama pahuñchāne ko pardār kabūtar maiñ huuñ

aa.ī phir fasl-e-bahārī madad ai josh-e-junūñ

do qadam chal nahīñ saktā huuñ vo lāġhar maiñ huuñ

nutq kahtā hai ki iisā mirā dam bhartā hai

dahan-e-yār ko da.avā hai ki kausar maiñ huuñ

jaadū bar-haq hai to kāfir hai ayaañ rā-che-bayāñ

terā maarā huā ai chashm-e-fusūñ-gar maiñ huuñ

mohtasib ko bhī hidāyat karūñ mai-noshī kī

vā.izā terī jagah gar sar-e-mimbar maiñ huuñ

na unheñ merī shikāyat na mujhe un kā gila

na kudūrat unheñ mujh se na mukaddar maiñ huuñ

hairat-e-husn se ik sakta kā aalam dekhā

ā.īna muñh ko tire taktā hai shashdar maiñ huuñ

daur-e-farhād gayā ye hai zamāna merā

be-sutūñ ab to uThā.e hue sar par maiñ huuñ

āj-kal husn-e-javānī pe jo hai un ko ġhurūr

naaz kahtā hai ki andāz se bāhar maiñ huuñ

barq o sīmāb kā 'āġhā' na rahe nām-o-nishāñ

dil kī betābī se ik baar jo muztar maiñ huuñ

nahin mumkin ki tere hukm se bahar main hun

ai sanam tabe-e-farman-e-muqaddar main hun

dil to hairan hai kyun shashdar-o-muztar main hun

ishq kahta hai ki us parde ke andar main hun

pairaw-e-silsila-e-zulf-e-muambar main hun

tauq se uzr na zanjir se bahar main hun

aab-ru-e-sadaf o zinat-e-gosh-e-mahbub

durr-e-nayab jo sunte ho wo gauhar main hun

ab subuk-dosh main hun bojh gale ka Tal jae

tegh-e-qatil se ilahi kahen be-sar main hun

taer-e-qibla-numa ka hai ishaara mujh se

nama pahunchane ko pardar kabutar main hun

aai phir fasl-e-bahaari madad ai josh-e-junun

do qadam chal nahin sakta hun wo laghar main hun

nutq kahta hai ki isa mera dam bharta hai

dahan-e-yar ko dawa hai ki kausar main hun

jadu bar-haq hai to kafir hai ayan ra-che-bayan

tera mara hua ai chashm-e-fusun-gar main hun

mohtasib ko bhi hidayat karun mai-noshi ki

waiza teri jagah gar sar-e-mimbar main hun

na unhen meri shikayat na mujhe un ka gila

na kudurat unhen mujh se na mukaddar main hun

hairat-e-husn se ek sakta ka aalam dekha

aaina munh ko tere takta hai shashdar main hun

daur-e-farhad gaya ye hai zamana mera

be-sutun ab to uThae hue sar par main hun

aaj-kal husn-e-jawani pe jo hai un ko ghurur

naz kahta hai ki andaz se bahar main hun

barq o simab ka 'agha' na rahe nam-o-nishan

dil ki betabi se ek bar jo muztar main hun