nahin nam-o-nishan sae ka lekin yar baiThe hain

nahīñ nām-o-nishāñ saa.e kā lekin yaar baiThe haiñ

uge shāyad zamīñ se ḳhud-ba-ḳhud dīvār baiThe haiñ

savār-e-kashti-e-amvāj-e-dil haiñ aur ġhāfil haiñ

samajhte haiñ ki ham dariyā-e-ġham ke paar baiThe haiñ

ujaaḌ aisī na thī duniyā abhī kal tak ye aalam thā

yahāñ do-chār baiThe haiñ vahāñ do-chār baiThe haiñ

phir aatī hai isī sahrā se āvāz-e-jaras mujh ko

jahāñ majnūñ se dīvāne bhī himmat haar baiThe haiñ

samajhte ho jinheñ tum sañg-e-mīl ai qāfile vaalo

sar-e-rah ḳhastgān-e-hasrat-raftār baiThe haiñ

ye jitne mas.ale haiñ mashġhale haiñ sab farāġhat ke

na tum be-kār baiThe ho na ham be-kār baiThe haiñ

tumheñ 'anjum' koī us se tavaqqo ho to ho varna

yahāñ to aadmī kī shakl se be-zār baiThe haiñ

nahin nam-o-nishan sae ka lekin yar baiThe hain

uge shayad zamin se KHud-ba-KHud diwar baiThe hain

sawar-e-kashti-e-amwaj-e-dil hain aur ghafil hain

samajhte hain ki hum dariya-e-gham ke par baiThe hain

ujaD aisi na thi duniya abhi kal tak ye aalam tha

yahan do-chaar baiThe hain wahan do-chaar baiThe hain

phir aati hai isi sahra se aawaz-e-jaras mujh ko

jahan majnun se diwane bhi himmat haar baiThe hain

samajhte ho jinhen tum sang-e-mil ai qafile walo

sar-e-rah KHastgan-e-hasrat-raftar baiThe hain

ye jitne masale hain mashghale hain sab faraghat ke

na tum be-kar baiThe ho na hum be-kar baiThe hain

tumhein 'anjum' koi us se tawaqqo ho to ho warna

yahan to aadmi ki shakl se be-zar baiThe hain