nahin qaul se fel tere mutabiq

nahīñ qaul se fe'l tere mutābiq

kahūñ kis tarah tujh ko ai yaar sādiq

na jannat ke qābil na dozaḳh ke laa.iq

mujhe kyuuñ kiyā ḳhalq ai mere ḳhāliq

hue hijr meñ vo marz mujh ko lāhiq

rahe dañg jis meñ atibbā-e-hāziq

bharosā karam par hai ham 'āsiyoñ ko

ġhazab par samajhte haiñ rahm us kā faa.iq

faqat kunh zaat us kī ab tak na samjhe

hue munkashif aur saare daqā.iq

jhagaḌ leñge aapas meñ shaiḳh o brahman

tujhe kyā bakheḌoñ se o mard-e-āshiq

jo ye us kī rahmat kī tuġhyāniyāñ haiñ

kujā zohd-e-zāhid kahāñ fisq-e-fāsiq

kiyā nafs ko mujh pe kyuuñ tū ne ġhālib

na thā kyā tirī bandagī ke meñ laa.iq

na rakhnā mujhe apnī rahmat se mahrūm

tirī zaat se hai ye ummīd-e-vāsiq

na taab aa.egī husn kī tere ai dost

maiñ muusā nahīñ huuñ jo jalve kā shā.eq

tajarrud kā 'ālam tujhe kyā burā thā

huā kis liye pā-e-band-e-alā.eq

shikāyat kā fiqra zabāñ tak na aayā

bahar-hāl kartā rahā shukr-e-ḳhāliq

sar o chashm se maiñ bajā lā.ūñ sāhib

jo ḳhidmat koī hove bande ke laa.iq

bhalā kis se bahlā.ūñ dil is chaman meñ

na sumbul na nasrīñ na gul na shaqā.iq

rūlāte ho 'āshiq ko be-vaj.h-o-bā.is

hañseñgī mirī jaan tum par ḳhalā.iq

kiye mo'jize husn ne donoñ yakjā

shab-e-tīra gesū jabīñ sub.h-e-sādiq

kahā sun ke afsāna-e-qai-o-lailā

'abas karte ho haal meñ zikr-e-sābiq

gayā vo zamāna vo log uḌ ga.e sab

na mā'shūq vaise rahe ab na 'āshiq

shunīdem nām-o-nishānash nadīdem

chū anqāst mā'dūm yār-e-muāfiq

mirī jaan muddat se martā huuñ tujh par

tire chāñd se muñh kā 'āshiq huuñ 'āshiq

huā rashk-e-lailā kī furqat meñ majnūñ

mirā haal aur qais kā hai mutābiq

'abas fauq detā hai tū ḳhud ko nādāñ

kiyā ek ko ek par us ne faa.iq

vo munshī bane qudrat-e-haq to dekho

jo maktab meñ paḌhte the inshā-e-fā.iq

du'ā hai yahī aur yahī hai tamannā

najaf meñ mare jā ke ye 'rind'-e-fāsiq

nahin qaul se fe'l tere mutabiq

kahun kis tarah tujh ko ai yar sadiq

na jannat ke qabil na dozaKH ke laiq

mujhe kyun kiya KHalq ai mere KHaliq

hue hijr mein wo marz mujh ko lahiq

rahe dang jis mein atibba-e-haziq

bharosa karam par hai hum 'asiyon ko

ghazab par samajhte hain rahm us ka faiq

faqat kunh zat us ki ab tak na samjhe

hue munkashif aur sare daqaiq

jhagaD lenge aapas mein shaiKH o brahman

tujhe kya bakheDon se o mard-e-ashiq

jo ye us ki rahmat ki tughyaniyan hain

kuja zohd-e-zahid kahan fisq-e-fasiq

kiya nafs ko mujh pe kyun tu ne ghaalib

na tha kya teri bandagi ke mein laiq

na rakhna mujhe apni rahmat se mahrum

teri zat se hai ye ummid-e-wasiq

na tab aaegi husn ki tere ai dost

main musa nahin hun jo jalwe ka shaeq

tajarrud ka 'alam tujhe kya bura tha

hua kis liye pa-e-band-e-alaeq

shikayat ka fiqra zaban tak na aaya

bahar-haal karta raha shukr-e-KHaliq

sar o chashm se main baja laun sahib

jo KHidmat koi howe bande ke laiq

bhala kis se bahlaun dil is chaman mein

na sumbul na nasrin na gul na shaqaiq

rulate ho 'ashiq ko be-wajh-o-bais

hansengi meri jaan tum par KHalaiq

kiye mo'jize husn ne donon yakja

shab-e-tira gesu jabin subh-e-sadiq

kaha sun ke afsana-e-qai-o-laila

'abas karte ho haal mein zikr-e-sabiq

gaya wo zamana wo log uD gae sab

na ma'shuq waise rahe ab na 'ashiq

shunidem nam-o-nishanash nadidem

chu anqast ma'dum yar-e-muafiq

meri jaan muddat se marta hun tujh par

tere chand se munh ka 'ashiq hun 'ashiq

hua rashk-e-laila ki furqat mein majnun

mera haal aur qais ka hai mutabiq

'abas fauq deta hai tu KHud ko nadan

kiya ek ko ek par us ne faiq

wo munshi bane qudrat-e-haq to dekho

jo maktab mein paDhte the insha-e-faiq

du'a hai yahi aur yahi hai tamanna

najaf mein mare ja ke ye 'rind'-e-fasiq