nahin roze se hain to kya adakari to karni hai

nahīñ roze se haiñ to kyā adākārī to karnī hai

amīr-e-shahr kī dāvat hai iftārī to karnī hai

kahāñ hai shervānī aur Topī lā.iye begam

abhī din hai magar pahle se tayyārī to karnī hai

abhī baaqī hai kuchh logoñ meñ jo īmān-dārī kī

kisī bhī tarah se vo duur bīmārī to karnī hai

kisī bhī tarah rishvat de ke pakkī naukrī kar lo

miyāñ duty tumheñ le de ke sarkārī to karnī hai

jahāñ par lomḌī kī tarah har chehra nazar aa.e

vahāñ thoḌī bahut ham ko bhī ayyārī to karnī hai

agar insāf bhī majrūh hotā hai to hone do

hameñ apne qabīle kī taraf-dārī to karnī hai

mire mālik mire aaqā maiñ banda aap kā lekin

milā hai hukm uupar se giraftārī to karnī hai

nahin roze se hain to kya adakari to karni hai

amir-e-shahr ki dawat hai iftari to karni hai

kahan hai sherwani aur Topi laiye begam

abhi din hai magar pahle se tayyari to karni hai

abhi baqi hai kuchh logon mein jo iman-dari ki

kisi bhi tarah se wo dur bimari to karni hai

kisi bhi tarah rishwat de ke pakki naukri kar lo

miyan duty tumhein le de ke sarkari to karni hai

jahan par lomDi ki tarah har chehra nazar aae

wahan thoDi bahut hum ko bhi ayyari to karni hai

agar insaf bhi majruh hota hai to hone do

hamein apne qabile ki taraf-dari to karni hai

mere malik mere aaqa main banda aap ka lekin

mila hai hukm upar se giraftari to karni hai