nahin uDaunga KHak roya nahin karunga

nahīñ uḌā.ūñgā ḳhaak royā nahīñ karūñgā

karūñgā maiñ ishq par tamāshā nahīñ karūñgā

mirī mohabbat bhī ḳhaas hai kyūñki ḳhaas huuñ maiñ

so aam logoñ meñ zikr is kā nahīñ karūñgā

use batāo farār kā naam to nahīñ ishq

jo kah rahā hai maiñ kār-e-duniyā nahīñ karūñgā

kabhī na sochā thā guftugū bhī karūñgā ghanToñ

aur apnī bātoñ meñ zikr terā nahīñ karūñgā

irādatan jo kiyā hai ab tak ġhalat kiyā hai

so ab koī kaam bil-irāda nahīñ karūñgā

tujhe maiñ apnā nahīñ samajhtā isī liye to

zamāne tujh se maiñ koī shikva nahīñ karūñgā

mirī tavajjoh faqat mire kaam par rahegī

maiñ ḳhud ko sābit karūñgā da.avā nahīñ karūñgā

agar maiñ haarā to maan lūñgā shikast apnī

tirī tarah se koī bahāna nahīñ karūñgā

agar kisī maslahat meñ pīchhe haTā huuñ 'taimūr'

to mat samajhnā ki ab maiñ hamla nahīñ karūñgā

nahin uDaunga KHak roya nahin karunga

karunga main ishq par tamasha nahin karunga

meri mohabbat bhi KHas hai kyunki KHas hun main

so aam logon mein zikr is ka nahin karunga

use batao farar ka nam to nahin ishq

jo kah raha hai main kar-e-duniya nahin karunga

kabhi na socha tha guftugu bhi karunga ghanTon

aur apni baaton mein zikr tera nahin karunga

iradatan jo kiya hai ab tak ghalat kiya hai

so ab koi kaam bil-irada nahin karunga

tujhe main apna nahin samajhta isi liye to

zamane tujh se main koi shikwa nahin karunga

meri tawajjoh faqat mere kaam par rahegi

main KHud ko sabit karunga dawa nahin karunga

agar main haara to man lunga shikast apni

teri tarah se koi bahana nahin karunga

agar kisi maslahat mein pichhe haTa hun 'taimur'

to mat samajhna ki ab main hamla nahin karunga