nahin ye muzhda-e-rahat kisi jawan ke liye

nahīñ ye muzhda-e-rāhat kisī javāñ ke liye

shabāb kā to zamāna hai imtihāñ ke liye

batā na rāz-e-mohabbat kisī ko ai nādāñ

bahut se aur bhī haiñ raaz rāz-dāñ ke liye

janāb-e-shaiḳh ne māñgī sharāb ye kah kar

zarā sī chāhiye ik ḳhaas mehrbāñ ke liye

ḳhayāl-e-barq se ham ne jalā diye ḳhud hī

vo chaar tinke jo rakkhe the āshiyāñ ke liye

hamārī vaj.h se vo bhī hai un ke zer-e-itāb

ye ek turfa musībat hai rāzdāñ ke liye

ḳhudā kī shaan vo fitne uThā rahī hai zamīñ

bane haiñ bā.is-e-hairat jo āsmāñ ke liye

qafas bhī raas hai mujh ko ye baat to hai ġhalat

durust ye hai ki jiitā huuñ āshiyāñ ke liye

kisī ko dair kisī ko haram nahīñ miltā

bhaTak rahe haiñ musāfir kahāñ kahāñ ke liye

tire ḳhirām ne mahshar kā raaz khol diyā

banā huā thā muammā ye ik jahāñ ke liye

zamīn faiz uThātī hai ḳhāksārī kā

bane the varna mah-o-mehr āsmāñ ke liye

zabāñ pe zikr mohabbat kā aa.e kyuuñ 'sāhir'

ye chiiz dil ke liye hai nahīñ zabāñ ke liye

nahin ye muzhda-e-rahat kisi jawan ke liye

shabab ka to zamana hai imtihan ke liye

bata na raaz-e-mohabbat kisi ko ai nadan

bahut se aur bhi hain raaz raaz-dan ke liye

janab-e-shaiKH ne mangi sharab ye kah kar

zara si chahiye ek KHas mehrban ke liye

KHayal-e-barq se hum ne jala diye KHud hi

wo chaar tinke jo rakkhe the aashiyan ke liye

hamari wajh se wo bhi hai un ke zer-e-itab

ye ek turfa musibat hai raazdan ke liye

KHuda ki shan wo fitne uTha rahi hai zamin

bane hain bais-e-hairat jo aasman ke liye

qafas bhi ras hai mujh ko ye baat to hai ghalat

durust ye hai ki jita hun aashiyan ke liye

kisi ko dair kisi ko haram nahin milta

bhaTak rahe hain musafir kahan kahan ke liye

tere KHiram ne mahshar ka raaz khol diya

bana hua tha muamma ye ek jahan ke liye

zamin faiz uThati hai KHaksari ka

bane the warna mah-o-mehr aasman ke liye

zaban pe zikr mohabbat ka aae kyun 'sahir'

ye chiz dil ke liye hai nahin zaban ke liye