nahin zarur ki takmil-e-muddaa dekhen

nahīñ zarūr ki takmīl-e-mudda.ā dekheñ

magar hai jī meñ ki ḳhūn-e-jigar bahā dekheñ

nuqūsh-e-pā jo hue jā rahe haiñ gard unheñ

thakāvatoñ se sharābor log kyā dekheñ

ye kyā safar hai ki sīdhe-sapāT raste haiñ

kabhī to ham koī pur-pech rāsta dekheñ

fasīl-e-shab se udhar de rahā ho koī sadā

hisār-e-ḳhvāb meñ lekin mujhe ghirā dekheñ

fazā meñ tair rahe hoñ hare-bhare chehre

ḳhud apne chehre ko lekin bujhā huā dekheñ

safar meñ shal hue jaate huuñ dhuup ke paañv

ufuq kī aañkh se bahtī huī hinā dekheñ

tulū-e-mahr se pahle bas ek pal ke liye

kisī diye kī tarah ham bhī jhilmilā dekheñ

ye din bhī 'ḳhālid'-e-shīrāz dekhne the hameñ

nazar uThā.eñ to patjhaḌ kā silsila dekheñ

nahin zarur ki takmil-e-muddaa dekhen

magar hai ji mein ki KHun-e-jigar baha dekhen

nuqush-e-pa jo hue ja rahe hain gard unhen

thakawaton se sharabor log kya dekhen

ye kya safar hai ki sidhe-sapaT raste hain

kabhi to hum koi pur-pech rasta dekhen

fasil-e-shab se udhar de raha ho koi sada

hisar-e-KHwab mein lekin mujhe ghira dekhen

faza mein tair rahe hon hare-bhare chehre

KHud apne chehre ko lekin bujha hua dekhen

safar mein shal hue jate hun dhup ke panw

ufuq ki aankh se bahti hui hina dekhen

tulu-e-mahr se pahle bas ek pal ke liye

kisi diye ki tarah hum bhi jhilmila dekhen

ye din bhi 'KHalid'-e-shiraaz dekhne the hamein

nazar uThaen to patjhaD ka silsila dekhen