nai hawa mein koi rang-e-kaenat mein gum

na.ī havā meñ koī rañg-e-kā.enāt meñ gum

huā hai saarā zamāna tasannuāt meñ gum

gale kā haar kahīñ ban na jaa.e mahrūmī

na honā bhuul ke husn-e-takallufāt meñ gum

kisī bhī shaḳhs pe us ko taras nahīñ aatā

amīr-e-shahr huā hai ye kin sifāt meñ gum

har ek gul ko mirī dastaras se duur kiyā

mirī nazar hai adū kī navāzishāt meñ gum

bashar bashar ne muqaffal kiyā hai bāb-e-amal

har ek zehn huā kaisī nafsiyāt meñ gum

kahīñ bhī rāh-numā ab nazar nahīñ aatā

maiñ kyā batā.ūñ ki huuñ kaun sī jihāt meñ gum

husūl-e-ilm mirā mudda.ā hai ai 'abrār'

isī liye huuñ kitāboñ meñ aur luġhāt meñ gum

nai hawa mein koi rang-e-kaenat mein gum

hua hai sara zamana tasannuat mein gum

gale ka haar kahin ban na jae mahrumi

na hona bhul ke husn-e-takallufat mein gum

kisi bhi shaKHs pe us ko taras nahin aata

amir-e-shahr hua hai ye kin sifat mein gum

har ek gul ko meri dastaras se dur kiya

meri nazar hai adu ki nawazishat mein gum

bashar bashar ne muqaffal kiya hai bab-e-amal

har ek zehn hua kaisi nafsiyat mein gum

kahin bhi rah-numa ab nazar nahin aata

main kya bataun ki hun kaun si jihat mein gum

husul-e-ilm mera muddaa hai ai 'abrar'

isi liye hun kitabon mein aur lughat mein gum