nai mushkil koi darpesh har mushkil se aage hai

na.ī mushkil koī darpesh har mushkil se aage hai

safar dīvāngī kā ishq kī manzil se aage hai

mujhe kuchh der meñ phir ye kinārā chhoḌ denā hai

maiñ kashtī huuñ safar merā har ik sāhil se aage hai

khaḌe haiñ saañs roke sab tamāsha dekhne vaale

ki ab mazlūm bas kuchh hī qadam qātil se aage hai

mujhe ab ruuh tak ik dard sā mahsūs hotā hai

to kyā vus.at mire ehsās kī is dil se aage hai

mire is kār-e-be-masraf ko kyā samjhegī ye duniyā

mirī ye sa.i-e-lā-hāsil har ik hāsil se aage hai

ye aksar 'shād' rakhtī hai mujhe ḳhush rañg lamhoñ se

mirī tanhā.ī terī raunaq-e-mahfil se aage hai

nai mushkil koi darpesh har mushkil se aage hai

safar diwangi ka ishq ki manzil se aage hai

mujhe kuchh der mein phir ye kinara chhoD dena hai

main kashti hun safar mera har ek sahil se aage hai

khaDe hain sans roke sab tamasha dekhne wale

ki ab mazlum bas kuchh hi qadam qatil se aage hai

mujhe ab ruh tak ek dard sa mahsus hota hai

to kya wusat mere ehsas ki is dil se aage hai

mere is kar-e-be-masraf ko kya samjhegi ye duniya

meri ye sai-e-la-hasil har ek hasil se aage hai

ye aksar 'shad' rakhti hai mujhe KHush rang lamhon se

meri tanhai teri raunaq-e-mahfil se aage hai