nai nai suraten badan par ujalta hun

na.ī na.ī sūrateñ badan par ujāltā huuñ

lahū se kaise ajiib manzar nikāltā huuñ

vo dil meñ utreñ to ek ho jaa.eñ raushnī deñ

dhanak ke rañgoñ ko apnī āñkhoñ meñ Dāltā huuñ

zamīn talvoñ se aa chimaTtī hai aag ban kar

hatheliyoñ par jab āsmāñ ko sambhāltā huuñ

havā meñ thoḌā sā rañg utre so is liye maiñ

gulāb kī pattiyāñ fazā meñ uchhāltā huuñ

koī nahīñ thā jo is musalsal sadā ko suntā

ye maiñ huuñ jo is diye ko sūraj meñ Dhāltā huuñ

'tarīr' sāñsoñ kā rañg niilā huā to jaanā

ḳhabar nahīñ thī ye saañp haiñ jin ko pāltā huuñ

nai nai suraten badan par ujalta hun

lahu se kaise ajib manzar nikalta hun

wo dil mein utren to ek ho jaen raushni den

dhanak ke rangon ko apni aankhon mein Dalta hun

zamin talwon se aa chimaTti hai aag ban kar

hatheliyon par jab aasman ko sambhaalta hun

hawa mein thoDa sa rang utre so is liye main

gulab ki pattiyan faza mein uchhaalta hun

koi nahin tha jo is musalsal sada ko sunta

ye main hun jo is diye ko suraj mein Dhaalta hun

'tarir' sanson ka rang nila hua to jaana

KHabar nahin thi ye sanp hain jin ko palta hun