nai subh chahte hain nai sham chahte hain

na.ī sub.h chāhte haiñ na.ī shaam chāhte haiñ

jo ye roz o shab badal de vo nizām chāhte haiñ

vahī shaah chāhte haiñ jo ġhulām chāhte haiñ

koī chāhtā hī kab hai jo avaam chāhte haiñ

isī baat par haiñ barham ye sitamgarān-e-ālam

ki jo chhin gayā hai ham se vo maqām chāhte haiñ

kise harf-e-haq sunā.ūñ ki yahāñ to us ko sunñā

na ḳhavās chāhte haiñ na avaam chāhte haiñ

ye nahīñ ki tū ne bhejā hī nahīñ payām koī

magar ik vahī na aayā jo payām chāhte haiñ

tirī raah dekhtī haiñ mirī tishna-kām āñkheñ

tire jalve mere ghar ke dar-o-bām chāhte haiñ

vo kitāb-e-zindagī hī na huī murattab ab tak

ki ham intisāb jis kā tire naam chāhte haiñ

na murād hogī puurī kabhī un shikāriyoñ kī

mujhe dekhnā jo 'zāhid' tah-e-dām chāhte haiñ

nai subh chahte hain nai sham chahte hain

jo ye roz o shab badal de wo nizam chahte hain

wahi shah chahte hain jo ghulam chahte hain

koi chahta hi kab hai jo awam chahte hain

isi baat par hain barham ye sitamgaran-e-alam

ki jo chhin gaya hai hum se wo maqam chahte hain

kise harf-e-haq sunaun ki yahan to us ko sunna

na KHawas chahte hain na awam chahte hain

ye nahin ki tu ne bheja hi nahin payam koi

magar ek wahi na aaya jo payam chahte hain

teri rah dekhti hain meri tishna-kaam aankhen

tere jalwe mere ghar ke dar-o-baam chahte hain

wo kitab-e-zindagi hi na hui murattab ab tak

ki hum intisab jis ka tere nam chahte hain

na murad hogi puri kabhi un shikariyon ki

mujhe dekhna jo 'zahid' tah-e-dam chahte hain