nairangiyan falak ki hain mere hi ji ke sath

nairañgiyāñ falak kī haiñ mere hī jī ke saath

ġham bhī isī ke saath ḳhushī bhī isī ke saath

dāman chhuḌā ke jab vo chale be-ruḳhī ke saath

hasrat lipaT ke rone lagī be-ruḳhī ke saath

dil chiiz kyā hai aur jigar kī hai asl kyā

māñgeñ vo jaan bhī to maiñ de duuñ ḳhushī ke saath

mujh se kabhī mile bhī to muñh pher kar mile

kī baat bhī unhoñ ne to kī be-ruḳhī ke saath

har-vaqt sāmnā rahā ranj-o-malāl kā

koī ghaḌī na guzrī hamārī ḳhushī ke saath

kyūñkar umiid ho ki bar aa.egā mudda.ā

jab dekhtā huuñ rahte haiñ vo mudda.ī ke saath

ġhairoñ ko rāhat aur musībat milī mujhe

vo un ke jī ke saath hai ye mere jī ke saath

dam bhar bhī ġham-gusār na ham ko milā koī

guzrī tamām umr yahāñ be-kasī ke saath

'sābir' kā hashr hashr meñ parvardigār ho

as.hāb-o-āl-e-pāk-o-janāb-e-nabī ke saath

nairangiyan falak ki hain mere hi ji ke sath

gham bhi isi ke sath KHushi bhi isi ke sath

daman chhuDa ke jab wo chale be-ruKHi ke sath

hasrat lipaT ke rone lagi be-ruKHi ke sath

dil chiz kya hai aur jigar ki hai asl kya

mangen wo jaan bhi to main de dun KHushi ke sath

mujh se kabhi mile bhi to munh pher kar mile

ki baat bhi unhon ne to ki be-ruKHi ke sath

har-waqt samna raha ranj-o-malal ka

koi ghaDi na guzri hamari KHushi ke sath

kyunkar umid ho ki bar aaega muddaa

jab dekhta hun rahte hain wo muddai ke sath

ghairon ko rahat aur musibat mili mujhe

wo un ke ji ke sath hai ye mere ji ke sath

dam bhar bhi gham-gusar na hum ko mila koi

guzri tamam umr yahan be-kasi ke sath

'sabir' ka hashr hashr mein parwardigar ho

ashab-o-al-e-pak-o-janab-e-nabi ke sath