naKHchir hun main kashmakash-e-fikr-o-nazar ka

naḳhchīr huuñ maiñ kashmakash-e-fikr-o-nazar kā

haq mujh se adā ho na dar-o-bast-e-hunar kā

maġhrib mujhe khīñche hai to roke mujhe mashriq

dhobī kā vo kuttā huuñ ki jo ghaaT na ghar kā

dabtā huuñ kisī se na dabātā huuñ kisī ko

qaa.el huuñ musāvāt-e-banī-nau-e-bashar kā

har chiiz kī hotī hai koī āḳhirī had bhī

kyā koī bigāḌegā kisī ḳhāk-basar kā

dil-gīr to be-shak huuñ pe naumīd nahīñ huuñ

raushan hai dil-e-shab meñ diyā nūr-e-sahar kā

poshīda nahīñ mujh se koī jazr-o-mad-e-shauq

mahram huuñ sadā dilbar-e-añgeḳhta-bar kā

zindāñ o salāsil se sadāqat nahīñ dabtī

hai shān-e-ka.ī silsila bas raqs-e-sharar kā

tasvīr koī bantī dikhā.ī nahīñ detī

kiyā sarfa abas ham ne kiyā ḳhūn-e-jigar kā

kyā shuġhl-e-shajar kaar hai afkār se behtar

saudā sar-e-shorīda meñ gar ho na samar kā

kyuuñ sar-ḳhush-e-raftār na ho ho qāfila-e-mauj

rahzan kā hai andesha na ġham zād-e-safar kā

Daalī hai sitāroñ pe kamand ahl-e-zamīñ ne

zohra kā vo afsūñ na fasāna vo qamar kā

har baat hai 'ḳhālid' kī zamāne se nirālī

bāshinda hai shāyad kisī duniyā-e-digar kā

naKHchir hun main kashmakash-e-fikr-o-nazar ka

haq mujh se ada ho na dar-o-bast-e-hunar ka

maghrib mujhe khinche hai to roke mujhe mashriq

dhobi ka wo kutta hun ki jo ghaT na ghar ka

dabta hun kisi se na dabaata hun kisi ko

qael hun musawat-e-bani-nau-e-bashar ka

har chiz ki hoti hai koi aaKHiri had bhi

kya koi bigaDega kisi KHak-basar ka

dil-gir to be-shak hun pe naumid nahin hun

raushan hai dil-e-shab mein diya nur-e-sahar ka

poshida nahin mujh se koi jazr-o-mad-e-shauq

mahram hun sada dilbar-e-angeKHta-bar ka

zindan o salasil se sadaqat nahin dabti

hai shan-e-kai silsila bas raqs-e-sharar ka

taswir koi banti dikhai nahin deti

kiya sarfa abas hum ne kiya KHun-e-jigar ka

kya shughl-e-shajar kar hai afkar se behtar

sauda sar-e-shorida mein gar ho na samar ka

kyun sar-KHush-e-raftar na ho ho qafila-e-mauj

rahzan ka hai andesha na gham zad-e-safar ka

Dali hai sitaron pe kamand ahl-e-zamin ne

zohra ka wo afsun na fasana wo qamar ka

har baat hai 'KHalid' ki zamane se nirali

bashinda hai shayad kisi duniya-e-digar ka