naqsh baiThe hai kahan KHwahish-e-azadi ka

naqsh baiThe hai kahāñ ḳhvāhish-e-āzādī kā

nañg hai naam rihā.ī tirī sayyādī kā

daad de varna abhī jaan pe khelūñ huuñ maiñ

dil jalānā nahīñ dekhā kisī fariyādī kā

tū ne talvār rakhī sar rakhā meñ banda huuñ

apnī taslīm kā bhī aur tirī jallādī kā

shahr kī sī rahī raunaq usī ke jīte-jī

mar gayā qais jo thā ḳhāna ḳhudā vaadī kā

shaiḳh kyā sūrateñ rahtī thiiñ bhalā jab thā dair

rū-ba-vīrānī ho is ka.abe kī ābādī kā

reḳhta rutbe ko pahuñchāyā huā us kā hai

mo'taqid kaun nahīñ 'mīr' kī ustādī kā

naqsh baiThe hai kahan KHwahish-e-azadi ka

nang hai nam rihai teri sayyaadi ka

dad de warna abhi jaan pe khelun hun main

dil jalana nahin dekha kisi fariyaadi ka

tu ne talwar rakhi sar rakha mein banda hun

apni taslim ka bhi aur teri jalladi ka

shahr ki si rahi raunaq usi ke jite-ji

mar gaya qais jo tha KHana KHuda wadi ka

shaiKH kya suraten rahti thin bhala jab tha dair

ru-ba-virani ho is kabe ki aabaadi ka

reKHta rutbe ko pahunchaya hua us ka hai

mo'taqid kaun nahin 'mir' ki ustadi ka