nargis pe to ilzam laga be-basari ka

nargis pe to ilzām lagā be-basarī kā

arbāb-e-gulistāñ pe nahīñ kam-nazarī kā

taufīq-e-rifāqat nahīñ un ko sar-e-manzil

raste meñ jinheñ paas rahā ham-safarī kā

ab ḳhānqah o madrasa o mai-kada haiñ ek

ik silsila hai qāfila-e-be-ḳhabarī kā

har naqsh hai ā.īna-e-nairañg-e-tamāshā

duniyā hai ki hāsil mirī hairāñ-nazarī kā

ab farsh se tā-arsh zabūñ-hāl hai fitrat

ik ma.arka dar-pesh hai azm-e-basharī kā

kab miltī hai ye daulat-e-bedār kisī ko

aur maiñ huuñ ki ronā hai isī dīda-varī kā

be-vāsta-e-ishq bhī rañg-e-ruḳh-e-parvez

unvān hai farhād kī ḳhūnīñ-jigarī kā

āḳhir tire dar pe mujhe le aa.ī mohabbat

dekhā na gayā haal mirī dar-badarī kā

dil meñ ho faqat tum hī tum āñkhoñ pe na jaao

āñkhoñ ko to hai rog pareshāñ-nazarī kā

be-pairvī-e-'mīr' 'hafīz' apnī ravish hai

ham par koī ilzām nahīñ kam-hunarī kā

nargis pe to ilzam laga be-basari ka

arbab-e-gulistan pe nahin kam-nazari ka

taufiq-e-rifaqat nahin un ko sar-e-manzil

raste mein jinhen pas raha ham-safari ka

ab KHanqah o madrasa o mai-kada hain ek

ek silsila hai qafila-e-be-KHabari ka

har naqsh hai aaina-e-nairang-e-tamasha

duniya hai ki hasil meri hairan-nazari ka

ab farsh se ta-arsh zabun-haal hai fitrat

ek marka dar-pesh hai azm-e-bashari ka

kab milti hai ye daulat-e-bedar kisi ko

aur main hun ki rona hai isi dida-wari ka

be-wasta-e-ishq bhi rang-e-ruKH-e-parwez

unwan hai farhad ki KHunin-jigari ka

aaKHir tere dar pe mujhe le aai mohabbat

dekha na gaya haal meri dar-badari ka

dil mein ho faqat tum hi tum aankhon pe na jao

aankhon ko to hai rog pareshan-nazari ka

be-pairwi-e-'mir' 'hafiz' apni rawish hai

hum par koi ilzam nahin kam-hunari ka