narmi hawa ki mauj-e-tarab-KHez abhi se hai

narmī havā kī mauj-e-tarab-ḳhez abhī se hai

ai ham-safīr ātish-e-gul tez abhī se hai

ik tāza-tar savād-e-mohabbat meñ le chalī

vo bū-e-pairahan ki junūñ-ḳhez abhī se hai

ik ḳhvāb-e-tā.irān-e-bahārāñ hai us kī aañkh

ta.abīr-e-abr-o-bād se labrez abhī se hai

shab-tāb abhī se us kī qabāoñ ke rang haiñ

ik dāstāñ jabīn-e-guhar-rez abhī se hai

guzrī hai ek rau mizha-e-ḳhvāb-nāk kī

dil meñ lahū kā rang bahut tez abhī se hai

ā.īna le ke ghuum ga.ī umr-e-navā-ḳhirām

tāza-e-ruḳhī kā moḌ balā-ḳhez abhī se hai

mub.ham se ek ḳhvāb kī ta.abīr kā hai shauq

nīñdoñ meñ bādaloñ kā safar tez abhī se hai

ik taaza mohr-e-lab se junūñ māñgtā hai naqsh

jumbish laboñ kī silsila-āmez abhī se hai

shāyad ki mahramāna bhī uTThe tirī nigāh

vaise tirī nigāh dil-āvez abhī se hai

narmi hawa ki mauj-e-tarab-KHez abhi se hai

ai ham-safir aatish-e-gul tez abhi se hai

ek taza-tar sawad-e-mohabbat mein le chali

wo bu-e-pairahan ki junun-KHez abhi se hai

ek KHwab-e-tairan-e-bahaaran hai us ki aankh

tabir-e-abr-o-baad se labrez abhi se hai

shab-tab abhi se us ki qabaon ke rang hain

ek dastan jabin-e-guhar-rez abhi se hai

guzri hai ek rau mizha-e-KHwab-nak ki

dil mein lahu ka rang bahut tez abhi se hai

aaina le ke ghum gai umr-e-nawa-KHiram

taza-e-ruKHi ka moD bala-KHez abhi se hai

mubham se ek KHwab ki tabir ka hai shauq

nindon mein baadalon ka safar tez abhi se hai

ek taza mohr-e-lab se junun mangta hai naqsh

jumbish labon ki silsila-amez abhi se hai

shayad ki mahramana bhi uTThe teri nigah

waise teri nigah dil-awez abhi se hai