aahan ki surKH tal pe hum raqs kar gae

aahan kī surḳh taal pe ham raqs kar ga.e

taqdīr terī chaal pe ham raqs kar ga.e

panchhī bane to rif.at-e-aflāk par uḌe

ahl-e-zamīñ ke haal pe ham raqs kar ga.e

kāñToñ se ehtijāj kiyā hai kuchh is tarah

gulshan kī Daal Daal pe ham raqs kar ga.e

vaa.iz fareb-e-shauq ne ham ko lubhā liyā

firdaus ke ḳhayāl pe ham raqs kar ga.e

har e'tibār-e-husn-e-nazar se guzar ga.e

har halqa-hā-e-jāl pe ham raqs kar ga.e

māñgā bhī kyā to qatra-e-chashm-e-tasarrufāt

'sāġhar' tire savāl pe ham raqs kar ga.e

aahan ki surKH tal pe hum raqs kar gae

taqdir teri chaal pe hum raqs kar gae

panchhi bane to rifat-e-aflak par uDe

ahl-e-zamin ke haal pe hum raqs kar gae

kanTon se ehtijaj kiya hai kuchh is tarah

gulshan ki Dal Dal pe hum raqs kar gae

waiz fareb-e-shauq ne hum ko lubha liya

firdaus ke KHayal pe hum raqs kar gae

har e'tibar-e-husn-e-nazar se guzar gae

har halqa-ha-e-jal pe hum raqs kar gae

manga bhi kya to qatra-e-chashm-e-tasarrufat

'saghar' tere sawal pe hum raqs kar gae