nashsha-e-mai ke siwa kitne nashe aur bhi hain

nashsha-e-mai ke sivā kitne nashe aur bhī haiñ

kuchh bahāne mire jiine ke liye aur bhī haiñ

ThanDī ThanDī sī magar ġham se hai bharpūr havā

ka.ī bādal mirī āñkhoñ se pare aur bhī haiñ

ishq-e-rusvā tire har dāġh-e-farozāñ kī qasam

mere siine meñ ka.ī zaḳhm hare aur bhī haiñ

zindagī aaj talak jaise guzārī hai na pūchh

zindagī hai to abhī kitne maze aur bhī haiñ

hijr to hijr thā ab dekhiye kyā bītegī

us kī qurbat meñ ka.ī dard na.e aur bhī haiñ

raat to ḳhair kisī tarah se kaT jā.egī

raat ke ba.ad ka.ī kos kaḌe aur bhī haiñ

ġham-e-daurāñ mire bāzū-e-shikasta se na khel

mashġhale merī javānī ke liye aur bhī haiñ

vādī-e-ġham meñ mujhe der tak āvāz na de

vādī-e-ġham ke sivā mere patte aur bhī haiñ

nashsha-e-mai ke siwa kitne nashe aur bhi hain

kuchh bahane mere jine ke liye aur bhi hain

ThanDi ThanDi si magar gham se hai bharpur hawa

kai baadal meri aankhon se pare aur bhi hain

ishq-e-ruswa tere har dagh-e-farozan ki qasam

mere sine mein kai zaKHm hare aur bhi hain

zindagi aaj talak jaise guzari hai na puchh

zindagi hai to abhi kitne maze aur bhi hain

hijr to hijr tha ab dekhiye kya bitegi

us ki qurbat mein kai dard nae aur bhi hain

raat to KHair kisi tarah se kaT jaegi

raat ke baad kai kos kaDe aur bhi hain

gham-e-dauran mere bazu-e-shikasta se na khel

mashghale meri jawani ke liye aur bhi hain

wadi-e-gham mein mujhe der tak aawaz na de

wadi-e-gham ke siwa mere patte aur bhi hain