nashsha-e-shauq-e-rang mein tujhse judai ki gai

nashsha-e-shauq-e-rañg meñ tujh se judā.ī kī ga.ī

ek lakīr ḳhuun kī biich meñ khīñch dī ga.ī

thī jo kabhī sar-e-suḳhan merī vo ḳhāmushī ga.ī

haa.e kuhan-e-sinan kī baat haa.e vo baat hī ga.ī

shauq kī ek umr meñ kaise badal sakegā dil

nabz-e-junūn hī to thī shahr meñ Dūbtī ga.ī

us kī galī se uTh ke maiñ aan paḌā thā apne ghar

ek galī kī baat thī aur galī galī ga.ī

us kī umīd-e-nāz kā mujh se ye maan thā ki aap

umr guzār dījiye umr guzār dī ga.ī

daur-ba-daur dil-ba-dil dard-ba-dard dam-ba-dam

tere yahāñ ri.āyat-e-hāl nahīñ rakhī ga.ī

'jaun' junūb-e-zard ke ḳhāk-basar ye dukh uThā

mauj-e-shimāl-e-sabz-jāñ aa.ī thī aur chalī ga.ī

kyā vo gumāñ nahīñ rahā haañ vo gumāñ nahīñ rahā

kyā vo umiid bhī ga.ī haañ vo umiid bhī ga.ī

nashsha-e-shauq-e-rang mein tujh se judai ki gai

ek lakir KHun ki bich mein khinch di gai

thi jo kabhi sar-e-suKHan meri wo KHamushi gai

hae kuhan-e-sinan ki baat hae wo baat hi gai

shauq ki ek umr mein kaise badal sakega dil

nabz-e-junun hi to thi shahr mein Dubti gai

us ki gali se uTh ke main aan paDa tha apne ghar

ek gali ki baat thi aur gali gali gai

us ki umid-e-naz ka mujh se ye man tha ki aap

umr guzar dijiye umr guzar di gai

daur-ba-daur dil-ba-dil dard-ba-dard dam-ba-dam

tere yahan riayat-e-haal nahin rakhi gai

'jaun' junub-e-zard ke KHak-basar ye dukh uTha

mauj-e-shimal-e-sabz-jaan aai thi aur chali gai

kya wo guman nahin raha han wo guman nahin raha

kya wo umid bhi gai han wo umid bhi gai