nasib wasl tumhaara kaho to kyun-kar ho

nasīb vasl tumhārā kaho to kyūñ-kar ho

firāq-e-yār meñ taskīn ho to kyūñ-kar ho

tū apne vā'de kā sachchā jo ho to kyūñ-kar ho

ye tujh se jhuuT kī ho tark ḳhū to kyūñ-kar ho

na jal ke ḳhaak ho jab tak ki misl-e-parvāna

ho taish dil kā hamāre faro to kyūñ-kar ho

tire marīz ke gur sau 'ilāj hoñ lekin

shifā na us ke nasīboñ meñ ho to kyūñ-kar ho

kisī pe rāz-e-nihāñ dil kā tere ai āñkho

jo tum na girya se afshā karo to kyūñ-kar ho

ye ham bhī chāhte haiñ tark-e-'ishq ho lekin

jo dil pe bas na ho ai nāseho to kyūñ-kar ho

mileñ na ḳhaak meñ jab tak tumhāre kushta-e-nāz

damīda ḳhaak se ho nāz-e-bū to kyūñ-kar ho

jigar pe zaḳhm to khaa.e magar mazā hāsil

namak-fishāñ ho na vo jang-jū to kyūñ-kar ho

karam kahāñ ke sitam bhī ho karte naaz se tum

jo ye bhī ho to ġhanīmat hai vo to kyūñ-kar ho

'zafar' jo ho na mohabbat meñ dil se dil ko raah

vo mere haal se āgāh ho to kyūñ-kar ho

nasib wasl tumhaara kaho to kyun-kar ho

firaq-e-yar mein taskin ho to kyun-kar ho

tu apne wa'de ka sachcha jo ho to kyun-kar ho

ye tujh se jhuT ki ho tark KHu to kyun-kar ho

na jal ke KHak ho jab tak ki misl-e-parwana

ho taish dil ka hamare faro to kyun-kar ho

tere mariz ke gur sau 'ilaj hon lekin

shifa na us ke nasibon mein ho to kyun-kar ho

kisi pe raaz-e-nihan dil ka tere ai aankho

jo tum na girya se afsha karo to kyun-kar ho

ye hum bhi chahte hain tark-e-'ishq ho lekin

jo dil pe bas na ho ai naseho to kyun-kar ho

milen na KHak mein jab tak tumhaare kushta-e-naz

damida KHak se ho naz-e-bu to kyun-kar ho

jigar pe zaKHm to khae magar maza hasil

namak-fishan ho na wo jang-ju to kyun-kar ho

karam kahan ke sitam bhi ho karte naz se tum

jo ye bhi ho to ghanimat hai wo to kyun-kar ho

'zafar' jo ho na mohabbat mein dil se dil ko rah

wo mere haal se aagah ho to kyun-kar ho