nasihat-garo dil lagaya to hota

nasīhat-garo dil lagāyā to hotā

kabhī ḳhanjar-e-ishq khāyā to hotā

na aatā ki aatā shikāyat na rahtī

mujhe anjuman meñ bulāyā to hotā

na mānūñgā nāseh ki dil par hai qaabū

lagā kar kisī se dikhāyā to hotā

ye maanā adū par hai mailān-e-ḳhātir

koī roz us ko satāyā to hotā

na aate to ḳhanjar hī vo bhej dete

ki ham ne gale se lagāyā to hotā

mirī saḳht-jānī ke shikve bajā the

kabhī dast-e-nāzuk uThāyā to hotā

'zahīr' aaj daavā hai jin ko zabāñ kā

suḳhan apnā un ko sunāyā to hotā

nasihat-garo dil lagaya to hota

kabhi KHanjar-e-ishq khaya to hota

na aata ki aata shikayat na rahti

mujhe anjuman mein bulaya to hota

na manunga naseh ki dil par hai qabu

laga kar kisi se dikhaya to hota

ye mana adu par hai mailan-e-KHatir

koi roz us ko sataya to hota

na aate to KHanjar hi wo bhej dete

ki hum ne gale se lagaya to hota

meri saKHt-jaani ke shikwe baja the

kabhi dast-e-nazuk uThaya to hota

'zahir' aaj dawa hai jin ko zaban ka

suKHan apna un ko sunaya to hota