nauhagaron mein dida-e-tar bhi usi ka tha

nauhagaroñ meñ dīda-e-tar bhī usī kā thā

mujh par ye zulm bār-e-digar bhī usī kā thā

dekhā mujhe to tark-e-ta.alluq ke bāvajūd

vo muskurā diyā ye hunar bhī usī kā thā

āñkheñ kushād-o-bast se badnām ho ga.iiñ

sūraj usī kā ḳhvāb-e-sahar bhī usī kā thā

ḳhanjar-dar-āstīñ hī milā jab kabhī milā

vo teġh khīñchtā to ye sar bhī usī kā thā

nishtar chubhe hue the rag-e-jāñ ke ās-pās

vo chāragar thā aur mujhe Dar bhī usī kā thā

mahfil meñ kal 'farāz' hī shāyad thā lab-kushā

maqtal meñ aaj kāsa-e-sar bhī usī kā thā

nauhagaron mein dida-e-tar bhi usi ka tha

mujh par ye zulm bar-e-digar bhi usi ka tha

dekha mujhe to tark-e-talluq ke bawajud

wo muskura diya ye hunar bhi usi ka tha

aankhen kushad-o-bast se badnam ho gain

suraj usi ka KHwab-e-sahar bhi usi ka tha

KHanjar-dar-astin hi mila jab kabhi mila

wo tegh khinchta to ye sar bhi usi ka tha

nishtar chubhe hue the rag-e-jaan ke aas-pas

wo chaaragar tha aur mujhe Dar bhi usi ka tha

mahfil mein kal 'faraaz' hi shayad tha lab-kusha

maqtal mein aaj kasa-e-sar bhi usi ka tha