nawed-e-amn hai bedad-e-dost jaan ke liye

naved-e-amn hai bedād-e-dost jaañ ke liye

rahī na tarz-e-sitam koī āsmāñ ke liye

balā se gar mizha-e-yār tishna-e-ḳhūñ hai

rakhūñ kuchh apnī bhī mizhgān-e-ḳhūñ fishāñ ke liye

vo zinda ham haiñ ki haiñ rū-shanās-e-ḳhalq ai ḳhizr

na tum ki chor bane umr-e-jāvedāñ ke liye

rahā balā meñ bhī maiñ mubtala-e-āfat-e-rashk

balā-e-jāñ hai adā terī ik jahāñ ke liye

falak na duur rakh us se mujhe ki maiñ hī nahīñ

darāz-dasti-e-qātil ke imtihāñ ke liye

misāl ye mirī koshish kī hai ki murġh-e-asīr

kare qafas meñ farāham ḳhas āshiyāñ ke liye

gadā samajh ke vo chup thā mirī jo shāmat aa.ī

uThā aur uTh ke qadam maiñ ne pāsbāñ ke liye

ba-qadr-e-shauq nahīñ zarf-e-tangnā-e-ġhazal

kuchh aur chāhiye vus.at mire bayāñ ke liye

diyā hai ḳhalq ko bhī tā use nazar na lage

banā hai aish tajammul husain ḳhaañ ke liye

zabāñ pe bār-e-ḳhudāyā ye kis kā naam aayā

ki mere nutq ne bose mirī zabāñ ke liye

nasīr-e-daulat-o-dīñ aur muīn-e-millat-o-mulk

banā hai charḳh-e-barīñ jis ke āstāñ ke liye

zamāna ahd meñ us ke hai mahv-e-ārā.ish

baneñge aur sitāre ab āsmāñ ke liye

varaq tamām huā aur mad.h baaqī hai

safīna chāhiye is bahr-e-be-karāñ ke liye

adā-e-ḳhās se 'ġhālib' huā hai nukta-sarā

salā-e-ām hai yārān-e-nukta-dāñ ke liye

nawed-e-amn hai bedad-e-dost jaan ke liye

rahi na tarz-e-sitam koi aasman ke liye

bala se gar mizha-e-yar tishna-e-KHun hai

rakhun kuchh apni bhi mizhgan-e-KHun fishan ke liye

wo zinda hum hain ki hain ru-shanas-e-KHalq ai KHizr

na tum ki chor bane umr-e-jawedan ke liye

raha bala mein bhi main mubtala-e-afat-e-rashk

bala-e-jaan hai ada teri ek jahan ke liye

falak na dur rakh us se mujhe ki main hi nahin

daraaz-dasti-e-qatil ke imtihan ke liye

misal ye meri koshish ki hai ki murgh-e-asir

kare qafas mein faraham KHas aashiyan ke liye

gada samajh ke wo chup tha meri jo shamat aai

uTha aur uTh ke qadam main ne pasban ke liye

ba-qadr-e-shauq nahin zarf-e-tangna-e-ghazal

kuchh aur chahiye wusat mere bayan ke liye

diya hai KHalq ko bhi ta use nazar na lage

bana hai aish tajammul husain KHan ke liye

zaban pe bar-e-KHudaya ye kis ka nam aaya

ki mere nutq ne bose meri zaban ke liye

nasir-e-daulat-o-din aur muin-e-millat-o-mulk

bana hai charKH-e-barin jis ke aastan ke liye

zamana ahd mein us ke hai mahw-e-araish

banenge aur sitare ab aasman ke liye

waraq tamam hua aur madh baqi hai

safina chahiye is bahr-e-be-karan ke liye

ada-e-KHas se 'ghaalib' hua hai nukta-sara

sala-e-am hai yaran-e-nukta-dan ke liye