nawed-e-yaum-e-bahaaran KHizan se zahir ho

naved-e-yaum-e-bahārāñ ḳhizāñ se zāhir ho

misāl-e-saut-e-pareshāñ fuġhāñ se zāhir ho

tujhe gumāñ hai agar ḳhud pe lafz-e-raushan kā

ridā-e-shabnam-e-ijz-e-bayāñ se zāhir ho

chamak uThe mirī āñkhoñ meñ ashk kī sūrat

jo aag dil meñ hai raushan zabāñ se zāhir ho

kisī bhī samt se ubhre sitāra-e-āvāz

nahīñ ye qaid ki vo āsmāñ se zāhir ho

vo kā.enāt kā ḳhāliq sahī magar 'āsif'

yaqīñ hai ḳhud pe use to gumāñ se zāhir ho

nawed-e-yaum-e-bahaaran KHizan se zahir ho

misal-e-saut-e-pareshan fughan se zahir ho

tujhe guman hai agar KHud pe lafz-e-raushan ka

rida-e-shabnam-e-ijz-e-bayan se zahir ho

chamak uThe meri aankhon mein ashk ki surat

jo aag dil mein hai raushan zaban se zahir ho

kisi bhi samt se ubhre sitara-e-awaz

nahin ye qaid ki wo aasman se zahir ho

wo kaenat ka KHaliq sahi magar 'asif'

yaqin hai KHud pe use to guman se zahir ho