naya fusun hi dikhaen koi zamane mein

nayā fusūñ hī dikhā.eñ koī zamāne meñ

charāġh mujh meñ jaleñ maiñ charāġh ḳhāne meñ

dhuāñ dhuāñ sī fazā se guzarne vaale log

ajiib shaġhl ke mālik haiñ āshiyāne meñ

maiñ iḳhtilāf nahīñ kar rahā magar mujh ko

nazar na aayā koī dīda-var zamāne meñ

ġhubār-e-rāh se niklegā shahsavār-e-ḳhayāl

use bhī shāmil-e-kirdār rakh fasāne meñ

ḳhud apnī gard se aTtī hai chashm-e-ḳhvāb-āsār

so mere haath kaTe aa.ina uThāne meñ

samundaroñ se ilāqa nahīñ magar 'jāved'

ye ham jo ḳharch hue kashtiyāñ banāne meñ

naya fusun hi dikhaen koi zamane mein

charagh mujh mein jalen main charagh KHane mein

dhuan dhuan si faza se guzarne wale log

ajib shaghl ke malik hain aashiyane mein

main iKHtilaf nahin kar raha magar mujh ko

nazar na aaya koi dida-war zamane mein

ghubar-e-rah se niklega shahsawar-e-KHayal

use bhi shamil-e-kirdar rakh fasane mein

KHud apni gard se aTti hai chashm-e-KHwab-asar

so mere hath kaTe aaina uThane mein

samundaron se ilaqa nahin magar 'jawed'

ye hum jo KHarch hue kashtiyan banane mein