naya hai shahr nae aasre talash karun

nayā hai shahr na.e aasre talāsh karūñ

tū kho gayā hai kahāñ ab tujhe talāsh karūñ

jo dasht meñ bhī jalāte the fasl-e-gul ke charāġh

maiñ shahr meñ bhī vahī aable talāsh karūñ

tū aks hai to kabhī merī chashm-e-tar meñ utar

tire liye maiñ kahāñ aa.ine talāsh karūñ

tujhe havās kī āvārgī kā ilm kahāñ

kabhī maiñ tujh ko tire sāmne talāsh karūñ

ġhazal kahūñ kabhī saada se ḳhat likhūñ us ko

udaas dil ke liye mashġhale talāsh karūñ

mire vajūd se shāyad mile surāġh tirā

kabhī maiñ ḳhud ko tire vāste talāsh karūñ

maiñ chup rahūñ kabhī be-vaj.h hañs paḌūñ 'mohsin'

use gañvā ke ajab hausle talāsh karūñ

naya hai shahr nae aasre talash karun

tu kho gaya hai kahan ab tujhe talash karun

jo dasht mein bhi jalate the fasl-e-gul ke charagh

main shahr mein bhi wahi aable talash karun

tu aks hai to kabhi meri chashm-e-tar mein utar

tere liye main kahan aaine talash karun

tujhe hawas ki aawargi ka ilm kahan

kabhi main tujh ko tere samne talash karun

ghazal kahun kabhi sada se KHat likhun us ko

udas dil ke liye mashghale talash karun

mere wajud se shayad mile suragh tera

kabhi main KHud ko tere waste talash karun

main chup rahun kabhi be-wajh hans paDun 'mohsin'

use ganwa ke ajab hausle talash karun