naya mai-kade mein nizam aa gaya

nayā mai-kade meñ nizām aa gayā

uThīñ bandisheñ izn-e-ām aa gayā

nazar meñ vo kaif-e-davām aa gayā

ki goyā kisī kā payām aa gayā

mohabbat meñ vo bhī maqām aa gayā

ki mizhgāñ pe ḳhuuñ lab pe naam aa gayā

sar-e-rāh kāñTe bichhātā hai shauq

junūñ ko bhī kuchh ehtimām aa gayā

na ilzām un par na aġhyār par

ye dil aap hī zer-e-dām aa gayā

badal hī gayā bazm-e-ishrat kā rañg

mirā naġhma-e-dard kaam aa gayā

kidhar se ye sankī mahaktī havā

kidhar se vo nāzuk-ḳhirām aa gayā

tamāshā nahīñ thā mirā iztirāb

koī kyuuñ ye bālā-e-bām aa gayā

bayāñ ho rahā thā fasāna mirā

magar bār-bār un kā naam aa gayā

kabhī sāmne kuchh ḳhamoshī rahī

kabhī duur se kuchh payām aa gayā

jo dār-o-rasan se bhī ruktā nahīñ

saroñ meñ vo saudā-e-ḳhām aa gayā

vo 'zaidī' vahī rind-e-ātish-navā

vo zinda diloñ kā imaam aa gayā

naya mai-kade mein nizam aa gaya

uThin bandishen izn-e-am aa gaya

nazar mein wo kaif-e-dawam aa gaya

ki goya kisi ka payam aa gaya

mohabbat mein wo bhi maqam aa gaya

ki mizhgan pe KHun lab pe nam aa gaya

sar-e-rah kanTe bichhata hai shauq

junun ko bhi kuchh ehtimam aa gaya

na ilzam un par na aghyar par

ye dil aap hi zer-e-dam aa gaya

badal hi gaya bazm-e-ishrat ka rang

mera naghma-e-dard kaam aa gaya

kidhar se ye sanki mahakti hawa

kidhar se wo nazuk-KHiram aa gaya

tamasha nahin tha mera iztirab

koi kyun ye baala-e-baam aa gaya

bayan ho raha tha fasana mera

magar bar-bar un ka nam aa gaya

kabhi samne kuchh KHamoshi rahi

kabhi dur se kuchh payam aa gaya

jo dar-o-rasan se bhi rukta nahin

saron mein wo sauda-e-KHam aa gaya

wo 'zaidi' wahi rind-e-atish-nawa

wo zinda dilon ka imam aa gaya